सिन्धुली । भदौ २३ र २४ गते भएको जेनजी आन्दोलनको क्रममा लुटपाट गरिएका सामानहरु फिर्ता गर्न जिल्ला प्रशासन कार्यालय सिन्धुलीले शनिबार सूचना जारी गरेको छ । लुटिएका सरकारी, व्यक्तिगत तथा सार्वजनिक सम्पत्तिहरु, अभिलेख तथा कागजातहरु र विद्युतिय सामग्रीहरु यथाशिघ्र फिर्ता गर्न प्रशासनले शनिबार सूचना प्रकाशन गरि अनुरोध गरेको हो ।
प्रमुख जिल्ला अधिकारी दिनेश सागर भुसालले सूचना जारी गर्दै महत्वपूर्ण अभिलेख, कागजात, कम्प्युटर, ल्यापटप, प्रिन्टर, क्यामरा, पंखा, व्याट्री, अन्य विद्युतिय सामग्री लगाएतका जिन्सी सामग्रीहरु, फर्निचर, नगद तथा गरगहना, उपहार, मूर्ति, तथा धातुजन्य सामग्रीहरु, सुरक्षा उपकरण तथा सञ्चार सेट वा सार्वजनिक सम्पत्तिहरु फिर्ता गर्न आग्रह गरेको हो ।
सूचनामा आन्दोलनका क्रममा केहि उछृंखल व्यक्तिहरुले लुटपाट गरेर लगेको सामग्रीहरु केहि सज्जन व्यक्तिहरुले समेत सुरक्षित राखिदिएको सामान समेत फिर्ता दिन आग्रह गरिएको छ ।
त्यस्तै प्रशासनले त्यस्ता सामग्री किनबेच तथा खरिदबिक्री नगर्नु नगराउनुहुन समेत सूचनामा अनुरोध गरिएको छ । सामग्री लुटपाटका सन्दर्भमा कुनै सूचना वा जानकारी प्राप्त भएमा नजिकको सुरक्षा निकायमा सूचना दिन समेत सूचनामा आग्रह गरिएको छ ।
सामग्री फिर्ता नगरे सिसिटिभि फुटेज, सामाजिक सञ्जालमा पोष्ट गरिएका भिडियो र फोटोका आधारमा समेत पहिचान र अनुसन्धान गरि यस्ता कार्यमा संलग्न व्यक्तिलाई कानुन बमोजिम कारवाहि गरिने समेत सूचनामा उल्लेख छ ।
कार्यालयले जिल्ला प्रशासन कार्यालयबाट लगिएका ल्यापटप, कम्प्युटर, क्यामेरा लगाएका सामग्रीहरु कन्ट्रोल सिस्टम र सफ्टवेयरमा आधारित भएकाले व्यक्तिगत रुपमा प्रयोग गर्न नसकिने भएको समेत कार्यालयले जनाएको छ । जिल्ला प्रशासन कार्यालय सिन्धुलीले कार्यालयका नागरिकता, राष्ट्रिय परिचयपत्र, राहदानी लगाएतका विवरणका लागि मात्र प्रयोग हुने सामग्री लुटेको समेत जनाएको छ ।
