सिन्धुली । पूर्वप्रधानन्यायाधिश सुशीला कार्की शुक्रबार अन्तरिम सरकारको प्रधानमन्त्री नियुक्त भएकी छन् । उनको उदय निर्दलिय सरकार प्रमुखका रुपमा भएको छ । उनलाई राष्ट्रपति रामचन्द्र पौडेलले प्रधानमन्त्री नियुक्त गरेका हुन् ।
प्रधानमन्त्रीमा नियुक्त भएसँगै उनले पहिलो महिला प्रधानन्यायाधिसको इतिहाससँगै पहिलो महिला प्रधानमन्त्रीको समेत इतिहास रचेकी छिन । उनको सपथ समेत सकिएको छ ।
नयाँ मन्त्री परिषद गठन गरिने भनिए पनि शुक्रबार अबेरसम्म मन्त्रीपरिषद गठन हुन नसकेपछि कार्कीले एक्लै सपथ लिएकी छिन । जेनजीको माग अनुसार उनलाई राष्ट्रपति कार्यालयले प्रधानमन्त्री नियुक्त गरेको थियो ।
मन्त्रिपरिषदको पहिलो बैठकबाट संसद विघटनको निर्णय गरी स्वीकृतिको निम्ति राष्ट्रपति समक्ष सिफारिस गर्ने र ६ महिनाभित्र संसदीय निर्वाचन गर्ने सहमतिपछि कार्की प्रधानमन्त्री नियुक्त भएकी हुन । मन्त्रिपरिषदले संसद विघटनको सिफारिस गरेपछि राष्ट्रपतिबाट स्वीकृत हुनेछ ।
त्यस्तै, प्रधानमन्त्री कार्कीको सिफारिसमा राष्ट्रपति पौडेलले संसद विघटन गरि आगामी २१ फागुनका लागि चुनाव मिति समेत घोषणा गरेका छन् । शीतल निवासमा शुक्रबार राती कार्कीलाई राष्ट्रपति पौडेलले पद तथा गोपनीयताको शपथ ग्रहण गराए लगत्तै उनले पदभार समेत ग्रहण गरेकी छन् ।
राष्ट्रपति पौडेलले देशमा उत्पन्न असाधारण परिस्थितिलाई सम्बोधन गर्नुपर्ने, नेपालको संविधानको पालना, नेपालको एकताको प्रवद्र्धन, युवापुस्ताको आकांक्षा, राजननीतिक दल तथा सरोकारवालासँगको छलफल समेतका आधारमा कार्कीलाई प्रधानमन्त्रीमा नियुक्त गरेको जनाएका छन् ।
नियुक्तिसँगै अब कार्कीले ६ महिनाभित्रमा निर्वाचन गराएर निर्वाचित जनप्रतिनिधिलाई सत्ता हस्तान्तरण गर्नुपर्नेछ । राष्ट्रपतिले संसद् विघटन गर्दै अन्तरिम सरकारलाई ६ महिनाभित्र नयाँ सरकार गठन गर्ने म्यान्डेट दिएका हुन् ।
