सिन्धुली । घ्याङ्लेख गाउँपालिकामा कन्सुलर सेवा सहजिकरण गाउँपालिकाको कार्यालयबाट उपलब्ध हुने भएको छ । गााउँपालिकाले सोमबार सुचना जारी गर्दै कन्सुलर सेवा सहजिकरण गाउँपालिकाको कार्यालयबाट गरिने जनाएको छ ।
प्रमुख प्रशासकीय अधिकृत दाताराम प्याकुरेलले सूचना जारी गर्दै यस अघि श्रम स्वीकृती लिई विदेशमा रहेका श्रमिकको हकमा वैदेशिक रोजगार बोर्डबाट प्रदान हुने कल्याणकारी सेवाहरु (राहत, उद्द्वार, क्षतिपूर्तिको सहजिकरण गाउँपालिकाको कार्यालय मार्फत प्रदान गरिदै आएकोमा अब कन्सुलर सेवा विभागबाट प्रदान गरिने सेवा समेत गाउँपालिकाबाट हुने जनाएका छन ।
कन्सुलर सेवाहरुमा विदेशमा समस्यामा परेको जानकारी तथा गुनासो, बिदेशमा रहेका व्यक्तिहरुको खोजतलास तथा उद्वार, वैदेशिक रोजगारको शिलशिलामा विदेशमा कुनै कारणले मृत्यु भएमा शव झिकाउने र शव घरसम्म ल्याउने जस्ता सेवा उपलब्ध गराउने छ ।
त्यस्तै घाइते वा मृतकको क्षतिपूर्ति तथा आर्थिक सहायता वा बीमा रकम दाबी गर्न,सामान्य कानुनी परामर्श तथा सहायता र विदेशमा आवश्यक कागजातहरुको लागि कानुनी हकदार प्रमाणित, मृतकको धर्मिक आस्था प्रमाणित सेवा उपलब्ध गराउने घ्याङलेख गाउँपालिका रोजगार सेवा केन्द्रले जनाएको छ ।
यी सेवाहरु विभागको अनलाईन प्रणाली प्रयोग गरि गाउँपालिकामा रहेको रोजगार सेवा केन्द्र मार्फत प्रदान गर्न सुचारु गरिएकोले जुनसुकै अवस्थामा बिदेशमा रहेका व्यक्तिहरु समस्यामा परेको लगाएतका सेवाहरु आवश्यक परेमा सम्बन्धित सरोकारवालाहरुलाई गाउँपालिकाको रोजगार सेवा केन्द्रमा सम्पर्क गर्न समेत सूचना मार्फत अनुरोध गरिएको छ ।
