सिन्धुली । भूमि व्यवस्था, सहकारी तथा गरिवी निवारण मन्त्री बलराम अधिकारीले ‘जीवनभर मेरो जग्गाको स्वामित्व चाहियो’ भनेर नागरिकहरु रुँदै हिँडेको बताउँदै यस्तो अवस्थाको अन्त्य गर्नुपर्ने सरकार र भूमि समस्या समाधान आयोगको जिम्मेवारी रहेको बताए ।
शनिबार सिन्धुलीमाढीमा भूमि समस्या समाधान आयोगका पदाधिकारी तथा सदस्यहरु र सहकारी अभियन्ताहरुसँग अन्तक्र्रिया तथा भेटघाट गर्दै उनले लालपूर्जा नपाएकालाई लालपूर्जा दिने कामलाई तिव्रता दिन र छिटो काम गर्न आग्रह गरे ।
मन्त्री अधिकारीले भूमि समस्या समाधान आयोगलाई अन्तिम आयोग बनाउने गरि काम गर्न भूमि आयोग सिन्धुलीका पदाधिकारी तथा सदस्यहरुलाई निर्देशन दिएका हुन ।
उनले सधै जग्गा पाईन्छ, जंगल फँडानी गर्न पाईन्छ भन्ने कुराको अन्त्य गर्न पनि भूमि समस्या समाधान आवश्यक रहेको बताए । आयोगले सार्वजनिक जग्गा र जंगलको सिमा निर्धारण गर्ने बताउँदै जंगल मिच्नेलाई कानुनी कारवाहिको दायरामा ल्याउने गरि काम तिव्र गतिमा अगाडि बढाउन आग्रह गरे ।
नमिलेका कानुनलाई परिवर्तन गर्न वर्तमान सरकारले अध्यादेश ल्याईएको बताउँदै कानुनी बाधालाई हटाउने काम सरकारले गर्ने बताए ।
लालपूर्जा दिने नारा कुनै पनि दलको चुनावी नारा नहुने गरि काम गर्न र अहिलेको सरकार र भूमि समस्या समाधान आयोगप्रति उठेका भ्रमलाई चिर्न समेत आग्रह गरेका छन । जोखिमयुक्त अवस्थामा बसेका भूमिहिन, दलितलाई समेत सुरक्षित स्थानमा सार्ने काम आयोगले गर्ने अधिकारीले बताए । जंगल फाँड्न जाने, नयाँ ठाउँ खोज्ने हैन, सुरक्षित स्थान मात्र खोज्ने वातावरण आयोगले बनाउनेमा विश्वास व्यक्त गरे ।
मन्त्री अधिकारीले सहकारी संस्थाहरुको सन्दर्भमा कुरा गर्दै ‘सहकारी भनेका खत्तमै हुन, कामै नलाग्ने हुन, ऋण लगेकाले तिर्नै पर्दैन’ भनि प्रचार गरिएका भ्रमलाई चिर्न सहकारी अभियन्ताहरुलाई आग्रह गरेका छन । उनले सबै सहकारीलाई एकै ठाउँमा राखेर नहेर्न पनि आग्रह गरेका छन ।
मन्त्री अधिकारीले केन्द्रमा २२ वटा सहकारी समस्याग्रस्त रहेको र बागमती प्रदेशमा २७ वडा सहकारी समस्याग्रस्त रहेको तथ्यांक भएको बताउँदै सहकारीको अवस्था सहितको एकीन तथ्यांक निर्माण गरेर तथ्य सहित भ्रम चिर्न आग्रह गरे ।
राम्रो चलेका सहकारीलाई हत्तोत्साहि नहुने गरि अवस्था विग्रेका सहकारीलाई सुधार गर्दै अगाडि बढ्ने वातावरण बनाउन सबैसँग आग्रह गरेका छन ।
सहकारी अपचलनमा संलग्न भएका व्यक्तिहरुलाई सरकारले कानुनी दायरामा ल्याउने गरि काम भएको बताउँदै निराशा बढ्न नदिन आग्रह गरे । उनले सहकारीलाई सरकारको अर्थतन्त्रको तीन खम्बामध्ये एक भएको कुरालाई नविर्सन पनि आग्रह गरेका छन ।
मन्त्री अधिकारीले राष्ट्रिय गौरवको आयोजना सुनकोशी मरिण डाईभर्सनको अवलोकन गर्नुका साथै मालपोत कार्यालयको समेत अनुगमन गरेका छन । यस्तै नेकपा एमालेका केन्द्रीय सदस्य समेत रहेका अधिकारीले नेकपा एमाले सिन्धुलीका नेता तथा कार्यकर्ताहरुसँग समेत भेटघाट गरेका छन । भेटघाट कार्यक्रममा बोल्दै उनले भूमि समस्या समाधान र सहकारप्रतिका भ्रमलाई चिर्दै अगाडि बढ्न पार्टी पंत्तिलाई आग्रह गरेका छन ।
