सिन्धुली । नेपाल निजामती कर्मचारी संगठनका केन्द्रीय सचिव सूर्य कुवँरले नेपालको संविधान, लोकतन्त्रका विशेषता र निजामती सेवा ऐनका कारण कर्मचारीले ट्रेड युनियन अधिकार प्राप्त गरेको बताएका छन । उनले ट्रेड युनियन अधिकार हनन गर्ने अधिकार कसैलाई नभएको बताए ।
शनिबार नेपाल निजामती कर्मचारी संगठन सिन्धुलीको १२ औं जिल्ला अधिवेशनको सिन्धुलीमाढीमा उद्घाटन गर्दै कुँवरले संसदमा पेश भएको संघिय निजामती सेवा विद्येयकबाट ट्रेड युनियन अधिकार हटाउन भएको चर्चाले कर्मचारीहरुलाई त्रसित बनाएको भन्दै कर्मचारी संगठनलाई ट्रेड युनियन अधिकार स्थापित नभएमा ऐन स्वीकार्य नहुने बताए । उनले हरेक राजनीतिक परिवर्तनमा कर्मचारीले समर्थन मात्र नजनाई सहभागि नै भएकाले अधिकार लडेर पाएको राजनीतिक दल तथा जनप्रतिनिधिहरुलाई स्मरण गराए ।
कर्मचारीलाई संवैधानिक र लोकतान्त्रिक अधिकार प्राप्त गर्दा बाधा परेमा कर्मचारी संगठन साथमा रहेको बताए । कुँवरले कर्मचारीहरुले आफ्नो कर्तव्य र उत्तरदायित्व पनि पुरा गर्ने र आफ्नो हक, अधिकार स्थापितका लागि पनि लड्ने गर्नु पर्नेमा जोड दिए ।
उनले कर्मचारीलाई सुशासनको साधक समेत भनेका छन । ‘प्रशासन र राजनीतिक नेतृत्वलाई सधै सहयोग गरेका छौं, उनले भने, हामीलाई काम गर्ने सहि वातावरण, सेवा सुविधा दिएमा सुशासन स्थापना गर्न सहयोगी बन्नेछौं ।’ उनले थपे, ‘हामी सुशासनको बाधक हैनौं, साधक हौं ।’
कार्यक्रममा बोल्दै नेपाल निजामती कर्मचारी संगठनका सचिवालय सदस्य तथा सिन्धुली इन्चार्ज पुरुषोत्तम दाहालले संघिय निजामती कर्मचारी ऐन आउने अन्तिम तयारीमा रहेको बताए । उनले ऐन कर्मचारीको स्थानीय तह, प्रदेश र संघलाई जोड्ने र कर्मचारीबीचको विभेद हटाउने गरि आउने दावी गरे ।
कर्मचारी संगठनका जिल्ला अध्यक्ष पदम मगरको अध्यक्षतामा भएको कार्यक्रममा बोल्दै प्रमुख जिल्ला अधिकारी लिलाप्रसाद शर्माले कर्मचारीलाई तीन तहका सरकारका सुशासनका नीति र कार्यक्रमहरुको परिधिभित्र रहि जनतालाई सेवा प्रभावकारी बनाउन उप्रेरकका रुपमा रहन, सार्वजनिक हित प्रवद्र्धन गर्न र सबै तहका सरकारलाई नीति निर्माणमा सहयोग गर्ने काम गर्नका लागि ट्रेड युनियन अधिकार दिएको बताए ।
कार्यक्रममा संगठनका केन्द्रीय सदस्य फडिन्द्र ढुंगेल, प्रदेश उपाध्यक्ष युवराज थापा अटल, नेकपा एमालेका केन्द्रीय सदस्य उमा कोईराला, नेकपा एमालेका प्रदेश सदस्य एवम भूमि आयोगका जिल्ला अध्यक्ष कौशल कोईराला, एमाले प्रदेश सदस्य एवम बागमति प्रदेशका पूर्व स्वास्थ्य मन्त्री प्रदिप कटुवाल, एमाले सिन्धुलीका उपाध्यक्ष कर्ण घिसिङ, नेपाल पत्रकार महासंघ बागमती प्रदेश उपाध्यक्ष बिमला पाण्डे, सिविए अध्यक्ष तिलक कार्की, कोष तथा लेखा नियन्त्रण कार्यालय सिन्धुलीका प्रमुख हरिहर शर्मा तिवारी, शिक्षक संगठन सिन्धुलीका अध्यक्ष गुणविक्रम कुँवर, राष्ट्रसेवक बचत तथा ऋण सहकारी संस्थाका अध्यक्ष बद्रीनारायण श्रेष्ठ, स्थानीय तह कर्मचारी संघका अध्यक्ष मुकेश तामाङ लगाएतले मन्तव्य व्यक्त गरेका थिए ।
कार्यक्रममा संगठनका निवर्तमान जिल्ला अध्यक्ष पुरुषोत्तम दाहाल र निवृत कर्मचारी नारायण न्यौपानेलाई सम्मान गरिएको थियो भने संगठनले चलाएको चिठ्ठा कार्यक्रममा मोवाईल प्राप्त गरेका जित बहादुर खत्रीलाई मोवाईल हस्तान्तरण समेत गरिएको थियो । कार्यक्रममा संगठनका जिल्ला उपाध्यक्ष प्रभुनाथ प्याकुरेलले स्वागत गरेका थिए भने कार्यक्रमको सहजीकरण जिल्ला सचिव डिल्ली सौगात घिमिरेले गरेका थिए ।
