सिन्धुली । अज्ञात समूहको गोली प्रहारबाट आइतबार सिन्धुलीको हरिहरपुरगढीमा एक शिक्षक घाईते भएका छन । कर्मैया हरिहरपुरगढी सडक खण्डको हरिहरपुरगढी गाउँपालिका ६ स्थित धाप्सेमा उनलाई गोली प्रहार भएको हो ।
तीन जनाको समूहमा रहेका अज्ञात व्यक्तिहरुको गोली प्रहारबाट मकवानपुरको बागमती गाउँपालिका १ बोटगाउँका ४० वर्षिय प्रेम बहादुर बम्जन घाईते भएको जिल्ला प्रहरी कार्यालय सिन्धुलीका एसपी गोविन्दराज काफ्लेले बताए ।
प्रदेश २–०३–००६ प ८५५४ नम्बरको मोटरसाइकलमा सवार बम्जनको दाहिने गालामा गोली लागेको र दाँतमा गोली अड्किएको उनले बताए । मोटरसाइकलमा बम्जन र उनका ३३ वर्षिय भाई दिल बहादुर बम्जन सवार रहेको र उनीहरु रौतहटको गैंयाटारमा रहेका आफन्तको घरबाट सर्लाहि सिन्धुली हुदै मकवानपुर जाँदै गरेका थिए ।
घाईते बम्जन मकवानपुरको बकैया गाउँपालिका ३ हात्तिसुँढेमा रहेको बुद्ध माध्यामिक विद्यालयका प्रधानाध्यापक हुन । गोली प्रहारबाट घाईते भएका बम्जनको सर्लाहिको बागमतीमा रहेको मोडल अस्पतालमा उपचार गरि थप उपचारका लागि विरगञ्जको बयोधा अस्पताल लगिएको छ । घाईतेको अवस्था खतरामुक्त रहेको अस्पतालले जानकारी दिएको एसपी काफ्लेले जानकारी दिएका छन ।
गोली प्रहार गर्ने तीन जनाको पहिचान खुल्न सकेको छैन । तराई मूलका जस्ता देखिने ती व्यक्तिले मोटरसाईकल रोकेर पैसा मागेको र पैसा नदिएपछि कटुवा पेस्तोलले गोली हानेको प्रारम्भिक अनुसन्धानबाट खुलेको काफ्लेले बताए ।
