सिन्धुली । कमलामाई नगरपालिकाका युवाहरुले आगामी आर्थिक वर्षमा कार्यान्वयनमा आउने गरि कमलामाई नगरपालिकाका ७ वटा विद्यालय र ७ वटा स्वास्थ्य संस्थाका समस्याको पहिचान गरि नगरपालिकालाई बुझाएका छन ।
उनीहरुले कमलामाई नगरपालिकाका उपप्रमुख मञ्जु देवकोटालाई बुझाएका हुन । ह्याण्ड्स नेपालले प्लान इन्टरनेशनल नेपालसँगको सहकार्यमा तालिम प्राप्त युवाहरुले नगरपालिकाका ६ वटा वडाका विद्यालय र स्वास्थ्य संस्थाका समस्या राखेका हुन ।
उनीहरुले स्वास्थ्य तथा सरसफाईसँग सम्बन्धित मागहरु राखेका हुन । उनीहरुले स्वास्थ्य संस्था र विद्यालयमा युवा नागरिक अंकपत्र कार्यान्वयन गर्ने चरणमा ती मागहरु राखिएको हो ।
उनीहरुले स्वास्थ्य संस्था तथा विद्यालयका शौचालयहरु लैंगिक मैत्री बनाउनुपर्ने, स्वास्थ्य संस्थामा किशोर किशोरी र महिलाहरुका लागि स्वास्थ्य जाँचको छुट्टै व्यवस्थापन गर्नुपर्ने, परामर्श कक्षको व्यवस्था गर्नुपर्ने, एम्बुलेन्स सेवा, स्वास्थ्य परामर्श लगाएतका माग समेत राखेका छन । उनीहरुले अपुग भवनहरु बनाउन समेत ती विद्यालयहरुमा माग गरेका छन ।
त्यस्तै महिला पुरुषका अलग अलग शौचालय, औषधिको पूर्ण व्यवस्थापन, निःशुल्क औषधिका लागि सूचना प्रवाह गर्नुपर्ने लगाएतका मागहरु समेत रहेका छन ।
विद्यालयहरुमा पिउने पानीको व्यवस्थापनलाई महत्वका साथ उठाईएको छ । शौचालय भित्र आवश्यक सामग्रीहरु, आवश्यक विपद प्रतिरोधक भवन निर्माण, सरसफाईका अन्य व्यवस्थापनको माग गरिएको छ । कुन विद्यालय वा स्वास्थ्य संस्थालाई कस्तो खालका योजना आवश्यक छन पहिचान गरि माग राखिएको युवाहरुले जनाएका छन ।
युवाहरुका माग बुझ्दै नगरपालिकाका उपप्रमुख मञ्जु देवकोटाले युवाहरुका योजना समेट्ने प्रतिवद्धता व्यक्त गरेकी छिन । उनले युवाहरुले स्थानीय सरकारसँग लिखित योजनाहरुको माग पेश गरेको र साझा सवाल उठाएकोमा धन्यवाद व्यक्त गरिन ।
