सिन्धुली/जिल्ला दुग्ध उत्पादन सहकारी संघ सिन्धुलीले सोमबार प्रधानमन्त्रीलाई ज्ञापन पत्र बुझाएको छ । सहायक प्रमुख जिल्ला अधिकारी भुमेश्वर पोख्रेल मार्फत प्रधानमन्त्रीलाई २१ बुँदे माग सहितको ज्ञापनपत्र बुझाएको हो ।
सहकारी संघका अध्यक्ष नवराज गजुरेलले उक्त ज्ञापनपत्र बुझाएका हुन । अल्पकालिन १४ बुँदे माग र ७ बुँदे दीर्घकालिन माग सहित ज्ञापनपत्र बुझाईएको हो ।
जिल्ला प्रशासन कार्यालय सिन्धुली मार्फत बुझाईएको ज्ञापनपत्रमा किसान देखि दुग्ध व्यवसायी र सहकारी समेतका माग रहेका छन ।
दुध उत्पादनले किसानको जीवन यापनमा सहयोग मिल्दै आएकोमा हाल जिल्लामा किसानहरूले दूध बिक्री गर्न नपाएको र बिक्री भएको चार महिना बितिसक्दा पनि किसानले दुधको रकम भुक्तानी पाउन नसकेकाले किसानको माग तत्काल सुन्नु पर्नेमा जोड दिईएको छ ।
तत्काल सम्बोधन गर्नु पर्ने मागहरूमा दूधको बिक्री वितरण सहज र सरल ढङ्गले हुनु पर्ने, हालसम्मको बाँकी रहेको दूधको भुक्तानी किसानले पाउनु पर्ने, सहुलियतपूर्ण ऋण कार्यक्रम कार्यान्वयनमा आउनु पर्ने, कृषि ऋणको समय सीमा ५ वर्षबाट बढाएर १५ वर्ष बनाउनुपर्ने, बिमा कार्यक्रम कार्यान्वयनमा आउनुपर्ने लगाएतका रहेका छन ।
यस्तै कृषक परिचयपत्र वितरण तुरुन्त गर्नु पर्ने र परिचयपत्रको आधारमा शिक्षा, स्वास्थ्य र सार्वजनिक यातायात खर्चमा कृषकलाई छुट हुनुपर्ने, दूध उत्पादनको आधारमा किसानले अनुदान पाउनु पर्ने, सहकारीबाट उत्पादित दानामाप्रति के.जी. अनुदान हुनु पर्ने, दुग्ध सहकारीमा बिजुलीको महसुल ५० प्रतिशत छुट हुनु पर्ने, महिनामा २ पटक किसानकोमा पशु प्राविधिक पुग्नु पर्ने, कृषि तथा पशु प्राविधिकहरूलाई किसानले बोलाएको बेला जाँदा कुनै पनि शुल्क तिर्न नपर्ने व्यवस्था गर्नु पर्ने, दूध उत्पादनको आधारमा विना झन्झट अनुदान उपलब्ध गराउनुपर्ने, पशु आहार दानाको नियमित गुणस्तर परीक्षण गर्नु पर्ने र पराल ओसार प्रसार गर्दा बाटोमा दिने विभिन्न झन्झट र हप्ता उठाउन बन्द गर्नु पर्ने माग गरिएको छ ।
यस्तै ज्ञापनपत्र मार्फत दुग्ध नीति बनाउँदा कृषकको सहभागिता हुनु पर्ने, राष्ट्रिय दुग्ध विकास बोर्ड संस्थानलाई पुनःर्संरचना गरी दुग्ध उत्पादक कृषकको सहभागितामा हुनु पर्ने, राष्ट्रिय दुग्ध विकास संस्थालाई सहकारी मोडेलमा लैजानुपर्ने, प्रत्येक जिल्लालाई दूध उत्पादन र बिक्री वितरणका कोटा निर्धारण गर्नुपर्ने, नीजि डेरी उद्योग सञ्चालन गर्ने सञ्चालकले खरिद बिक्रीको प्रतिबद्धता गर्नु पर्ने, उद्योगीले दूध खरिद गर्ने स्रोत परिमाण र शुद्धताको सुनिश्चित गरेको आधारमा मात्र दूध खरिद गर्नु पर्ने र बैंक ग्यारेन्टी राखेर मात्र दुग्ध व्यवसाय सञ्चालन गर्न पाउनु पर्ने लगाएतका दीर्घकालिन माग राखिएको छ ।
सिन्धुलीमा दैनिक १६ हजार २०० लिटर दूध संकलन तथा विक्री वितरण हुने गरेको समेत संघले जनाएको छ ।
