सिन्धुली । स्कुल बसले ठक्कर दिदा शनिबार एक पैदल यात्रीको मृत्यु भएको छ । दुधौली अरुणठाकुर सडक खण्ड अन्र्तगत दुधौली नगरपालिका वडा नम्बर १० स्थित रातमाटामा स्कुल बसले अटोलाई ठक्कर दिई बस अनियन्त्रित हुदा पैदल यात्रीलाई ठक्कर दिएको हो । बसको ठक्करले पैदलयात्री दुधौली नगरपालिका वडा नम्बर १३ का ५२ बर्षीय समर बहादुर तामाङको मृत्यु भएको जिल्ला प्रहरी कार्यालय सिन्धुलीका प्रहरी निरिक्षक केशव कटुवालले जानकारी दिए ।
जल्किनेबाट दुधौलीतर्फ आउँदै गरेको प्रदेश १—०५—००१ह०१८३ नम्बरको अटोलाई सोहि दिशाबाट आउँदै गरेको बा ४ ख ५१३० नम्बरको कमलामाई बोर्डिङ स्कुलको बसले ठक्कर दिएपछि बस अनियन्त्रित भई पैदल यात्रीलाई ठक्कर दिएको थियो ।
बसले अटोलाई ठक्कर दिंदा अटो चालक दुधौली नगरपालिका १३ का ५० बर्षीय सोनिलाल तामाङ र अटोमा सवार सोहि स्थानकी ३५ बर्षीय संगिता मोक्तान सामान्य घाइते भएको प्रहरीले जनाएको छ ।
बसले ठक्कर दिई मृत्यु भएपछि पैदल यात्रीका आफन्तले विरोध प्रदर्शन गरी मदन भण्डारी राजमार्ग बन्द गरेका थिए । मृतकको परिवारलाई स्कुलले क्षतीपूर्ति दिने सहमती भएपछि सडक खुलेको छ ।
