सिन्धुली । सिन्धुली प्रहरीले विस केजी अवैध चाँदी सहित दुई जनालाई नियन्त्रणमा लिएको छ । विपि राजमार्ग अन्र्तगत गोलन्जोर गाउँपालिका वडा नम्बर ५ खनियाखर्कमा चेकजाँचको क्रममा चाँदी सहित दुईजनालाई पक्राउ गरिएको जिल्ला प्रहरी कार्यालय सिन्धुलीले जनाएको छ ।
गढी प्रहरी चौकीले विराटनगरबाट काठमान्डौँ जाँदै गरेको नीजि कारमा चेकजाँच गनर्दा लुकाएर ल्याएको चार पोका चाँदी बरामद गरेको हो ।
मंगलबार विहान ३ बजे बागमती प्रदेश ०१–०२५च १०६९ नम्बरको नीजि कारमा डिक्की मुनि लुकाएर ल्याएको चाँदी बरामद गरिएको जिल्ला प्रहरी कार्यालय सिन्धुलीका एसपी राजकुमार सिलवालले बताए ।
उनले पत्रकार सम्मेलन गरि बरामद गरिएको चाँदी, कार र पक्राउ परेका व्यक्तिहरु सार्वजनिक गरेका छन ।
पक्राउ पर्नेमा गाडी चालक मोरङ जिल्ला विराटनगर महानगरपालिका वडा नम्बर ५ का २५ बर्षीय रोहित कुमार यादव र सोहि गाडीमा सवार महोत्तरी जिल्ला घर भई विराटनगर बस्दै आएका ३७ बर्षीय शेचन मानन्धरलाई नियन्त्रण लिइएको उनले बताए ।
चाँदी २४ लाख ६१ हजार ७ सय साठी रुपैंया बराबरको मुल्यको रहेको उनले बताए । चाँदीको विल तथा अन्य कुनै कागजात नभएकाले कहाँबाट ल्याएको, कहाँ लाने भन्ने विषयमा खुल्न नसकेको सिलवालले बताएका छन । चाँदी बरामदको घटनाको अनुसन्धान भईरहेको उनले बताए ।
चाँदी बरामद तथा पक्राउको अनुसन्धान आन्तरिक राजस्व कार्यालयले गर्ने भएकाले आन्तरिक राजस्व कार्यालय पठाउने तयारी गरिएको एसपी सिलवालले जानकारी दिए । चाँदीको मुख्य व्यक्ति को हो भन्ने खुल्न नसकेको उनले बताए । एसपी सिलवालले भने, ‘हामीले भारतबाट आएको हो की आशंका गरेका छौं, थप अनुसन्धानपछि खुल्ला ?’
