सिन्धुली । नागरिकता विद्येयक प्रमाणिकरणको विरुद्धमा बुधबार सिन्धुलीमाढीमा युवा विद्यार्थीले मसाल जुलुस प्रदर्शन गरेका छन । युवा विद्यार्थीले राष्ट्रपति रामचन्द्र पौडलको पुत्ला दहन समेत गरेका छन ।
नेकपा एमाले समर्थक युवा तथा विद्यार्थीले सिन्धुलीमाढीमा मसाल जुलुस प्रदर्शन गर्नुका साथै राष्ट्रपति रामचन्द्र पौडेलको पुत्ला दहन गरेका हुन । उनीहरुले वर्तमान सरकारलाई लेन्डुपको संज्ञा समेत दिए ।
अनेरास्ववियु र राष्ट्रिय युवा संघ सिन्धुलीको संयुक्त आयोजनामा नेकपा एमालेको पार्टी कार्यालयबाट सुरु भएको मसाल जुलुस जुनारचोकमा आएर सकिएको थियो । जुनार चोकमा आई युवा विद्यार्थीले राष्ट्रपतिको पुत्ला दहन गरेका हुन । नागरिकता विद्येयक राष्ट्रघाती भएकाले प्रमाणीकरण खारेज गर्न युवा विद्यार्थीले माग गरेका छन ।
प्रचण्डलाई भारत भ्रमण रद्ध गर्न समेत युवा विद्यार्थीको माग रहेको छ । नेपालको भूमिमाथि पटक पटक प्रहार भएको भन्दै युवा विद्यार्थीले ‘अखण्ड भारतको भन्दा ग्रेटर नेपालको प्रमाण धेरै छ, प्रस्ट बुझे जनताले देश बेच्ने गद्धार को रहेछ ?’ भन्ने नारा समेत लगाए ।
प्रधानमन्त्री प्रचण्ड र राष्ट्रपति रामचन्द्र पौडेललाई कलंकको साझेदार रहेको भन्दै विरोध समेत गरे । उनीहरुले नागरिकता विद्येयकको खारेजी, कालापानी लिपुलेकको नेपालको नक्सामा समेटिएको जमिन फिर्ता गर्र्न र अखण्ड भारतको नक्सामा नेपालको भूगोल हटाउन पहल गर्न माग गरेका छन ।
युवा विद्यार्थीले भारतीयलाई नागरिकता उपहार, देश वेच्ने प्रचण्ड गद्दार, प्रचण्डको भारत भ्रमण विन बुलाए मेहमान, प्रचण्डको सरकार विदेशी प्रभुसँग लम्पसार, चुच्चे नक्साको जमिन खोई मोदीसँग बोल्छौ कोही ? लगाएतका नाराबाजी गरेका थिए ।
जुलुसपछिको कोणसभालाई सम्बोधन गर्दै अनेरास्ववियुका नेता लालबहादुर बुढाथोकीले देख्दा कुनै व्यानरमुनीको आन्दोलन भए पनि हामी राष्ट्रविरुद्धको धावा बोलीरहदा टुलुटुलु हेरेर नबस्ने बताए । उनले प्रचण्डको भारत भ्रमण हुनु, भारतले अखण्ड भारतको नक्सामा नेपालको भूभाग समेट्नु र राष्ट्रियता विरोधी नागरिकता विद्येयकमा प्रमाणिकरण हुनुले कतै देश विरुद्धको काम हुदै गएको हो की भन्ने लागेको बताए ।
