सिन्धुली । तिनपाटन गाउँपालिकामा बहुमत वडा सहित गठबन्धनका उमेदवार विजयी भएका छन । गठबन्धनको तर्फबाट उमेदवार बनेका नेपाली कांग्रेसका कर्णबहादुर थापा मगर नेकपा एमालेका छत्र दाहाललाई १ हजार १ सय ९७ मतान्तरले हराउँदै अध्यक्षमा दोस्रो कार्यकालका लागि निर्वाचित भए ।
मगरले अध्यक्षमा ९ हजार २३९ मत पाएका छन् । उनका निकटतम प्रतिद्वन्द्व नेकपा एमालेका छत्रबहादुर दाहालले ८ हजार ४२ मत ल्याए ।
मगर ०७४ मा उनै दाहालसँग १९ मत अन्तरले विजयी भएका थापा मगरले यो पटक फराकिलो मतान्तर बनाएका हुन् । त्यतिखेर थापाले ५ हजार ७ सय १ मत प्राप्त गरेका थिए भने दाहालले ५ हजार ६ सय ८२ मत ल्याएका थिए ।
यस्तै उपाध्यक्षमा गठबन्धनका तर्फबाट उमेदवार बनेका नेकपा माओवादी केन्द्रका धन बहादुर पुलामी अशोक विजयी भएका छन ।
पुलामीले ८ हजार ३९९ मत प्राप्त गरे भने उनका निकटतम प्रतिद्वन्द्वी एमालेकी पदममाया तामाङले ७ हजार ९ सय ८ मत प्राप्त गरेकी छिन् । उनी ०७४ मा उपाध्यक्षमै विजयी भएकी थिइन् ।
तीन पाटन गाउँपालिकाको ११ वडामध्ये ९ वटा वडा सहित कांग्रेस वडाध्यक्ष सहित प्यानल नै विजयी भएको छ । वडा नं १ र ५ मा एमाले विजयी भएको छ ।
