सिन्धुली । आइतबार साँझ परेको पानीका कारण आएको बाढीले सिन्धुलीमाढीमा रहेको ग्वाङखोलामा बन्दै गरेको पक्कि पुल बगाएको छ ।
बाढीले निर्माणको अन्तिम चरणमा रहेको पक्की पुल भत्काएको हो । कमलामाई नगरपालिका वडा नं ६ को २ नं.बजार र वडा नं ५ को कारागार क्षेत्र जोड्ने ३० मिटर लामो पक्की पुल बाढीले भत्काएको हो ।
ढलानको तयारीमा रहेको पुलका सबै संरचना भत्काएको छ । खोलामा पानी निकासका लागि राखिएको ह्यूम पाइप सानो भएको र पर्याप्त पानीको निकास हुन नसक्दा पुल भत्किएको हो ।
पुल भत्कँदा करिब तीन करोडको क्षति भएको आंकलन गरिएको देवीरमण जेभीका प्रोजेक्ट म्यानेजर कुमार रिजालले बताए । उनका अनुसार चैतमै यति ठूलो बाढी आएर पुल भत्काउला भन्ने आँकलन समेत गरिएको थिएन ।
तीन दिनपछि पुल ढलानका लागि सबै तयारी पूरा गरिएको पनि उनले बताए । वाग्मती प्रदेश सरकार भौतिक पूर्वाधार मन्त्रालयको लगानीमा दुई वर्ष अघि निर्माण सुरु भएको पुलको लागत पाँच करोड ४१ लाख रहेको थियो ।
