सिन्धुली / नेकपा एमालेको १० आँै महाधिवेशनको तयारी स्वरुप देशभरका ६ हजार ७ सय ४८ वटा वडाहरुको वडा अधिवेशन शनिबार उद्घाटन गरिएको छ । नेकपा एमालेका केन्द्रीय अध्यक्ष केपी शर्मा ओलीले भर्चुअल माध्यमबाट एकै पटक वडा अधिवेशनको उद्घाटन गरेका हुन ।
शनिबार सम्पन्न प्रथम वडा अधिवेशनबाट जिल्लाका ७० वडाका वडा अधिवेशन निर्विरोध नेतृत्व चयन गर्दै सम्पन्न भएका छन भने नौ वटा वडामा नेतृत्व चयनमा प्रतिस्पर्धा देखिएको छ ।
सबै वडाहरुमा सर्वसम्मत नेतृत्व चयन गर्ने पार्टीको निर्देशन बमोजिम बाँकी रहेका वडामा समेत सर्वसम्मत नेतृत्व चयन गर्ने प्रयास भईरहेको नेकपा एमालेका केन्द्रीय सदस्य एवम् जिल्ला सह इन्चार्ज उमा कोइरालाले बताएकी छिन ।
जिल्लाका ७९ वडामा उद्घाटनका कार्यक्रम सकिएपछि नेतृत्व चयनको काम सुरु गरिएको हो ।
नेकपा एमालेको नयाँ विधान अनुसार पदाधिकारी सहित ३३ प्रतिशत महिला अनिवार्य गरिए अनुरुप नै नेतृत्व चयन भएको कोइरालाले बताईन । तथापी अध्यक्षमा महिलाको उपस्थिति देखिएको छैन । उपाध्यक्ष सचिव उपसचिव लगाएतका पदमा महिलाको उल्लेख्य सहभागिता देखिएको छ ।
एमाले निकट महिला नेताहरुको उपलब्ध बैठकले सबै पालिकामा महिलाको उल्लेख्य नेतृत्वको लागि आग्रह गरेको थियो । कमलामाई नगरपालिकामा सम्बन्धित वडामा रहेका अनेमसंघका नगर तथा जिल्लाका नेताहरुले नै महिला सहभागिताका लागि प्रयास गरेका थिए भने नगर तथा जिल्ला स्तरबाट अनुगमन समेत भएको थियो ।
कमलामाई नगरपालिका लगाएत जिल्लाका नौ वटै पालिकामा पालिका अधिवेशनका लागि प्रतिनिधिहरु समेत समावेशीताका आधारमा छनौट भएको कोइरालाले बताईन । अधिवेशन स्थगित हुने वडामा कमलामाई नगरपालिका १० र १४ दुधौली नगरपालिकाको वडा नं १४, मरिण गाउँपालिकाको वडा नं १, घ्याङ्लेख गाउँपालिकाको वडा नं ५, र हरिहरपुरगढी गाउँपालिकाका ४ वटा वडा रहेको नेकपा एमाले सिन्धुलीले जनाएको छ ।
एमालेले कातिक ९ गते देशभरका पालिका स्तरीय अधिवेशन गर्दैछ । अधिवेशनको उद्घाटन एकै पटक पार्टी अध्यक्ष केपी शर्मा ओलीबाट एकै साथ गरिने भएको छ । अधिवेशनले सवै वडाहरुमा अध्यक्ष १, उपाध्यक्ष १, सचिव १ र उपसचिव २ सहित ३१ सदस्य वडा पदाधिकारी चयन गरेको छ । नेकपा एमालेको १० औं महाधिवेशनका लागि स्थानिय तह कायम भएसंगै पहिलो पटक अधिवेशन हुन लागेको हो ।
