सिन्धुली । नेपाली सेनाद्वारा ऐतिहासिक पर्यटकीय क्षेत्र सिन्धुलीगढीमा निर्माण गरेको सिन्धुलीगढी युद्ध संग्रहालयको उद्घाटन बुधबार राष्ट्रपति विद्यादेवी भण्डारीले गरेकी छिन । उनले संग्रहालय उद्घाटन पछि सम्बोधन गर्दै सिन्धुलीगढी नेपालीहरुको सुरता र विरताको इतिहास रहेको बताएकी छिन । सिन्धुलीगढीमा नागरिक, तीन तहका सरकार र नेपाली सेनाको सहकार्यमा भएको पुनःनिर्माणको प्रशंसा गर्दै राष्ट्रपति भण्डारीले ऐतिहासिक क्षेत्रको संरक्षण र प्रवद्र्धनले पर्यटकीय विकासमा टेवा पुग्ने विश्वास व्यक्त गरेकी छिन ।
उनले सिन्धुलीगढीमा युद्ध संग्रहालय निर्माणमा सहयोग गर्ने सबैलाई धन्यवाद दिँदै नागरिक सैनिक सम्बन्धको उत्कृष्ट नमुना सिन्धुलीगढी युद्ध संग्रहालय भएको बताएकी छिन । भण्डारीले ऐतिहासिक स्थलहरुको प्रवद्र्धन र संरक्षणमा नागरिकको साथ पाईरहने अपेक्षा समेत गरिएको बताएकी छिन ।
देशको रक्षाका लागि पुर्खाले गरेको ऐतिहासिक काम भावी पुस्तालाई हस्तान्तरण गर्न युद्ध संग्रहालय महत्वपूर्ण हुने बताएकी छिन । उनले ऐतिहासिक क्षेत्र सिन्धुलीगढीको पुनःनिर्माण भईरहेकोमा खुशी व्यक्त गर्दै पर्यटन प्रवद्र्धन गरि आर्थिक लाभ लिन पनि आग्रह गरेकी छिन ।
उनले युवा पुस्तामा सिन्धुलीगढीको ऐतिहासिक महत्वलाई हस्तान्तरण गरि राष्ट्र, राष्ट्रियता र देशप्रेमको भाव बढाउनुपर्नेमा समेत जोड दिएकी छिन । उनले भनेकी छिन, ‘सिन्धुलीगढी युद्ध पुर्खाको योगदानलाई पाठ्यक्रम समावेश गरि राष्ट्र, राष्ट्रियता र देशप्रेम युवा पुस्तामा बढाउनुपर्छ ।’
कार्यक्रममा बोल्दै नेपाल सरकारका कानुन न्याय तथा संसदीय मामिला मन्त्री ज्ञानेन्द्र कार्कीले सिन्धुलीगढीले स्वतन्त्रता र राष्ट्रिय स्वाधिनतामा प्रमुख भूमिका खेलेको बताएका छन । उनले सरकारले ऐतिहासिक धरोहर संरक्षण र प्रवद्र्धन गर्ने प्रतिवद्ध रहेको समेत बताए ।
कार्यक्रममा बोल्दै सिन्धुली क्षेत्र नं. १ बाट निर्वाचित प्रतिनिधि सभा सदस्य गणेश कुमार पहाडीले सिन्धुलीगढी पुननिर्माणसँगै समृद्धिको आधार तय हुदै गएको बताए । उनले इतिहास र भूगोल अध्ययनका लागि सिन्धुलीगढी उपयुक्त ठाउँ भएको बताउँदै युद्ध संग्रहालयको निर्माणले आन्तरिक तथा बाह्य पर्यटन बढाउन महत्वपूर्ण भूमिका खेल्ने बताएका छन ।
उक्त संग्रहालय प्रधान सेनापति पूर्णचन्द्र थापाले कमलामाई नगरपालिका सिन्धुलीलाई हस्तान्तरण गरेका छन । संग्रहालयको हस्तान्तरण गर्दै प्रधान सेनापति थापाले इतिहासको जगेर्ना गर्दै भावी पुस्तालाई मार्गदर्शन गर्ने उद्देश्यले संग्रहालय निर्माण गरिएको बताए ।सो अवसरमा कमलामाई नगरपालिकाका मेयर खड्ग खत्रीले विहिबारदेखि नै संग्रहालय व्यवस्थित रुपमा सञ्चालन हुने बताए । कार्यक्रममा कमलामाई नगरपालिकाका उपमेयर मञ्जु देवकोटाले स्वागत गरेकी थिईन ।
यसैबीच सिन्धुलीगढीमा कमलामाई नगरपालिका सिन्धुलीले निर्माण गरेको सिन्धुलीगढीका युद्ध नायकहरुको शालिक अनावरण गरिएको छ । उक्त शालिकको अनावरण सेनापति पूर्णचन्द्र थापाले गरेका हुन ।
कार्यक्रममा कलाघर सिन्धुलीले राष्ट्रपति भण्डारीको स्वागत तथा सम्मानमा पञ्चेबाजा तथा भजन प्रस्तुत गरेको थियो भने वर्द बहादुर गणले गीति नाटक प्रस्तुत गरेको थियो ।
