बर्दिबास/महोत्तरीका पत्रकारहरुले लामो समयसम्म पनि न्युनतम पारिश्रमिक, नियुक्ति पत्र लगाएतका न्युनतम सुविधा समेत नपाएको गुनासो गरेका छन । न्युनतम पारिश्रमिक निर्धारण समितिको आयोजना तथा नेपाल पत्रकार महासंघ महोत्तरीको समन्वयमा महोत्तरीको वर्दिवासमा भएको अन्तक्र्रिया कार्यक्रममा पत्रकारहरुले श्रमजीवि पत्रकारका रुपमा लामो समय काम गरे पनि श्रमजीवि पत्रकार ऐनले तोकेका कुनै पनि सेवा सुविधा नपाएको गुनासो गरेका हुन ।
पत्रकार महासंघ महोत्तरीका अध्यक्ष कमलेश मण्डलको अध्यक्षता तथा महोत्तरीका निमित्त प्रमुख जिल्ला अधिकारी उपेन्द्र न्यौपानेको प्रमुख आतिथ्यतामा विहिबार भएको श्रमजीवि पत्रकार ऐनको कार्यान्वयन र जिल्लाका पत्रकारहरुको अवस्था विषयक अन्तत्र्रिmयामा उनीहरुले ऐनले तोकेका सेवा सुविधा नपाएको गुनासो गरेका हुन ।
कार्यक्रममा बोल्दै महोत्तरीका निमित्त प्रमुख जिल्ला अधिकारी न्यौपानेले गुणस्तरीय सेवा र ऐन कार्यान्वयनमा ध्यान दिन सञ्चारमाध्यमहरुलाई आग्रह गरेका छन । उनले ऐन कार्यान्वयन प्रभावकारी हुन नसक्दा श्रमजीवि पत्रकारहरुमा निराशा उत्पन्न भएको बताए ।
कार्यक्रममा बोल्दै महोत्तरीका एसपी दिनेश आचार्यले पत्रकारीता पेशामा सम्मानपूर्वक बाँच्न पाउने वातावरण बनाउन आवश्यक रहेको बताए ।
कार्यक्रममा बोल्दै नेपाल पत्रकार महासंघका निवर्तमान केन्द्रीय सदस्य द्वारिका काफ्लेले सरकारी मिडिया र ठूला मिडियाबाट श्रमजीवि पत्रकार ऐन कार्यान्वयन गर्न कडाई गर्नुपर्नेमा जोड दिए । उनले स्वरोजगारमूलक मिडियालाई व्यवस्थित गरि विज्ञापन बजारसँग जोड्ने र श्रमजीवि पत्रकार ऐन कार्यान्वयनमा कडाई गरेमा नेपालका सबै मिडियाकर्मीले न्युनतम पारिश्रमिक पाउन सक्ने अवस्था सृजना हुने बताए ।
न्युनतम पारिश्रमिक निर्धारण समितिका सदस्य बिमला पाण्डेले श्रमजीवि पत्रकार ऐनमा भएका व्यवस्था, हाल नेपालका पत्रकार र सञ्चारमाध्यममा कार्यरत पत्रकारहरुको अवस्थाका बारेमा जानकारी गराएकी थिईन । पाण्डेले कोभिड १९ का कारण पनि धेरै पत्रकारले रोजगारी गुमाउनु परेको, सञ्चारमाध्यमहरु बन्द हुन पुगेको बताएकी छिन । उनले श्रमजीवि पत्रकार ऐन कार्यान्वयनमा सञ्चार प्रतिष्ठानहरुले ध्यान दिनुपर्नेमा जोड दिईन ।
कार्यक्रममा बोल्दै प्रेस स्वतन्त्रता सेनानी रविन्द्र उप्रेतीले राजनीतिक हस्तक्षेपका कारण सरकारी सञ्चारमाध्यममा समेत पत्रकारले न्युनतम पारिश्रमिक नपाएको गुनासो गरे ।
नेपाल पत्रकार महासंघ महोत्तरीका अध्यक्ष कमलेश मण्डलले महोत्तरीमा १२ वटा एफएम, १० वटा साप्ताहिक पत्रिका, १ वटा दैनिक पत्रिका रहेकोमा कोभिडका कारण सबै पत्रिका बन्द भएको बताए । उनले जिल्लाका अधिकांश सञ्चारमाध्यमले लोककल्याणकारी विज्ञापन समेत नपाएको बताउँदै अधिकांश पत्रकारले न्युनतम पारिश्रमिक, नियुत्ति लगाएतका सेवा सुविधा नपाएको बताए । उनले श्रमजीवि पत्रकार ऐन कार्यान्वयन गराउन भूमिका खेलिदिन समेत समितिलाई आग्रह गरे ।
यस्तै महोत्तरीका अधिकांश सहभागि पत्रकारले आफुहरुले नियुक्ति पत्र, तलब नपाएको, २० वर्षसम्म मिडियामा काम गर्दा समेत जिल्लाका पत्रकारहरु स्टिन्जरका रुपमा काम गरिरहेको बताएका छन । यस्तै पत्रकारलाई निवृत भत्ता, आकस्मिक कोष, विमा, सहुलियत ऋणको व्यवस्था गर्न सरकारसँग माग समेत गरेका छन । उनीहरुले पत्रकारलाई सवल बनाउनका लागि मोफसलका सञ्चारमाध्यमलाई समेत सवल बनाउनुपर्ने हुदा सरकारको ध्यान जानुपर्ने समेत सुझाव दिएका छन ।
कार्यक्रममा गोपाल बराल (रासस), दिनेश महतो, राकेश चौधरी, ललन मण्डल, मुकेश खनाल, विनोद पौडेल, निरन्जन कुमार शाह, नवल किशोर, सञ्जीव कुमार मण्डल, राजकरण महतो लगाएतले श्रमजीवी पत्रकार ऐन कार्यान्वयन, समस्या र चुनौतीका बारेमा सुझाव राखेका थिए ।
