अत्यधिक हिंसा कमलामाईमा, यौनहिंसा, मानसिक हिंसा, शारीरिक हिंसा र स्रोत साधनबाट बञ्चित हुने अत्यधिक
सिन्धुली । जिल्लामा एक वर्षमा ३ सय ८८ वटा लैंगिक हिंसाका घटना भएका छन । सिन्धुली अस्पतालमा रहेको एकद्धार संकट व्यवस्थापन केन्द्रले बुधबार सार्वजनिक गरेको तथ्यांकमा ३ सय ८८ जना हिंसा प्रभावित महिला तथा बालिकाले उक्त केन्द्रबाट सेवा लिएको पाईएको हो ।
२०७७ साउन देखि २०७८ असार १५ सम्म सेवा लिएका महिला तथा बालिकाहरुको तथ्यांक सार्वजनिक गर्दै वार्षिक समिक्षा समेत गरिएको छ ।
केन्द्रबाट पीडितले मनोसामाजिक परामर्श, सुरक्षित आवास, कानुनी सहायता, आर्थिक सहायता लगाएतका सहायता लिएको सिन्धुली अस्पतालका मेडिकल सुपरिटेन्डेन एवम एकद्धार संकट व्यवस्थापन केन्द्रको लैंगिक हिंसा व्यवस्थापन समितिका सदस्य सचिव डा. उमेश प्रधानले बताए ।
प्रधानले एक वर्षमा केन्द्रले गरेका कामको प्रतिवेदन प्रस्तुत गर्दै १४ वर्षसम्मका २० जना, १५ वर्षदेखि १९ वर्षसम्मका ३८, २० देखि ४९ वर्षसम्मका ३ सय ४ जना र ५० वर्ष माथिका २६ जना महिलाहरु पीडित भएको बताए ।
केन्द्रमा आएका घटनालाई व्यवस्थापन गर्ने क्रममा एक वर्षमा १ सय ५१ जना पीडितलाई पुनस्र्थापना गरिएको तथ्यांकमा उल्लेख गरिएको छ । १ सय ५० पीडितलाई प्रहरी समक्ष रिफर गरिएको छ भने २५ जनालाई कानुनी सहायता प्रदान गरिएको छ । केन्द्रले ५० जनालाई सुरक्षित आवासका लागि सिफारिस गरेको समेत प्रधानले जनाएका छन ।
महिला तथा बालबालिकामाथि हुने हिंसा सबैभन्दा बढी कमलामाई नगरपालिकामा हुने गरेको केन्द्रको तथ्यांकले देखाएको छ । नगरपालिकामा २ सय ५ जना महिलाहरु हिंसाबाट प्रभावित भएको तथ्यांकले देखाएको छ ।
त्यस्तै दुधौली नगरपालिकामा ६९ जना, सुनकोशी गाउँपालिकामा २० जना, तिनपाटन गाउँपालिकामा २२ जना, मरिण गाउँपालिकामा १८ जना, गोलञ्जोर गाउँपालिकामा २३ जना, घ्याङलेख गाउँपालिकामा ९, फिक्कल गाउँपालिकामा ५, हरिहरपुरगढी गाउँपालिकामा ६ र अन्य ११ जना पीडित भएका छन ।
केन्द्रमा आएका हिंसाका घटनामा बलत्कार ४२, यौन दुव्र्यवहारका १६ वटा घटना रहेका छन ।
यस्तै कुटपिटका ९५, साधन स्रोतबाट बञ्चित गरेका ७०, मानसिक यातना दिएका १ सय २६ घटना भएको केन्द्रले जनाएको छ ।
एक वर्षको अवधिमा केन्द्रमा २ हजार ८ सय ५ जनाले मनोसामाजिक परामर्श लिएका छन । जसमा ५ सय ४८ जना पुरुषले समेत यो सेवा लिएको केन्द्रका सुनिता शर्माले बताएकी छिन । प्रमुख जिल्ला अधिकारी सुरेश न्यौपानेको अध्यक्षतामा छलफल तथा समिक्षा बैठक भएको थियो ।
