सिन्धुली । प्रादेशिक महोत्सव भएको २ वर्ष पछि सिन्धुली उद्योग वाणिज्य संघ सिन्धुलीले आम्दानी खर्चको विवरण सार्वजनिक गरेको छ । सोमबार सिन्धुलीमाढीमा पत्रकार सम्मेलनको आयोजना गरि संघले आयव्यय विवरण सार्वजनिक गरेको हो ।
२०७५ पुस १३ देखि २२ गतेसम्म सिन्धुलीमाढीमा भएको उक्त महोत्सवमा २१ लख ४० हजार २५२ रुपैंया खुद आम्दानी भएको उद्योग वाणिज्य संघ सिन्धुलीका अध्यक्ष अमरेश चन्द्र बैदारले बताए । उनका अनुसार उक्त महोत्सवमा ९६ लाख ७ हजार ७ सय ४५ रुपैंया आम्दानी भएको थियो भने खर्च ७४ लाख ६७ हजार ४ सय ९३ भएको बैदारले बताए ।
सार्वजनिक गरिएको हिसावमा सबैभन्दा बढी अतिथि सत्कार र कलाकार खर्च अत्यधिक रहेको छ । कलाकारका लागि १६ लाख ६९ हजार खर्च भएको देखिएको छ भने कलाकारको यातायातमा मात्र १ लाख २५ हजार खर्च भएको सार्वजनिक प्रतिवेदनमा उल्लेख छ । यस्तै अतिथि सत्कारमा ११ लाख १३ हजार ६०५ रुपैंया खर्च भएको देखिएको छ ।
उनका अनुसार महोत्सवमा गरिएको सम्झौता अनुसार ४ लाख ७५ हजार रकम उठ्न बाँकी रहेको छ । जसमा ठूला ठूला उद्योगहरुले समेत पैसा नदिएको वैदारले बताए । वैदारका अनुसार आरएमसी, उदयपुर सिमेन्ट उद्योग, मारुती सिमेन्ट, ग्लोबल आईएमई जस्ता कम्पनीहरुले महोत्सवको पैसा तिरेका छैनन ।
रकम नउठेका कारण र कोभिड १९ को जोखिमका कारण चाँडै हिसाव किताव सार्वजनिक गर्न नसकेको पनि सिन्धुली उद्योग वाणिज्य संघ सिन्धुलीले जनाएको छ ।
उधारो हिसाव देखाउन समस्या भएको समेत संघले जनाईरहदा साधारणसभा तथा निर्वाचनको पूर्वसन्ध्यामा आएर हिसाब किताव सार्वजनिक हुनुलाई स्थानीयले चुनावी रणनीतिका रुपमा समेत हेरेका छन ।
