सिन्धुली । कमलाामाई नगरपालिका वडा नं. ६ को खुलामञ्चमा प्रथम मेयर कपम फुटबल प्रतियोगिता सुरु भएको छ । कमलामाई नगरपालिकाको खेलकुद विकास समितिले शनिबारदेखि नकआउट चरणको प्रथम मेयर कप फुटबल सुरु गरेको हो ।
मेयर कप फुटबलको उद्घाटन गर्दै कमलामाई नगरपालिका सिन्धुलीका मेयर खड्ग खत्रीले नगरपालिकाका १४ वटा वडामा खेल मैदान बनाउने र सबै वडामा खेलकुद क्लबहरु निर्माण गर्ने घोषणा गरेका छन । उनले प्रत्येक वडामा खेल मैदान बनाउनका लागि नगरपालिकाले एकलाख बजेट विनियोजन गरेको बताएका छन ।
उनले खेलकुदको विकासका लागि नगरपालिकाले मेयर कप भलिवल, मेयर कप फुटवल, मेयर कप व्याडमिण्टन र उपमेयर कप भलिवल गर्दै आएको बताए । खत्रीले गाउँ गाउँमा युवा क्लब बनाएर खेलको विकास गर्नका लागि नगरपालिकाले एक वडा एक खेलकुद क्वल निर्माणको अभियान सुरु गरेको समेत बताएका छन ।
१४ वटै वडामा खेलाडी उत्पादन गर्ने अभियान स्वरुप क्लब निर्माण गर्न थालिएको उनले जानकारी दिए । खेलकुदको विकास राष्ट्रको विकास रहेको बताउँदै उनले राष्ट्रिय स्तरमा समेत गौरव राख्न सक्ने खेलाडी उत्पादन गर्न नगरपालिका लागि परेको बताएका छन । उनले भनेका छन, ‘युवा शक्तिको जोश, जाँगर र क्षमतालाई सहि रुपमा प्रयोग गर्न खेल क्षेत्रको विकासलाई नगरपालिकाले अगाडि बढाएको हो ।’
५ दिनसम्म चल्ने प्रतियोगितामा नगरपालिकाका ११ वटा वडाबाट ११ टिमको प्रतियोगितामा सहभागिता रहेको छ ।
नकआउट चरणमा खेलिने खेलमा विजेतालाई एकलाख र उपविजेता हुने टिमलाई पचास हजार, मेडल र प्रमाणपत्र सहितको पुरस्कार व्यवस्था गरिएको नगर खेलकुद विकास समितिका अध्यक्ष दिपेन्द्र फुयाँलले बताए । उनका अनुसार यो खेलका लागि नगरपालिकाले ३ लाख रुपैंया बजेट विनियोजन गरेको छ । उक्त खेलमा नगरपालिका भित्रका मात्र सहभागिहरुलाई भाग लिने मौका दिईएको छ ।
शनिबारको खेलमा वडा नं. १ र १३ विजयी
शनिबारको उद्घाटन खेल कमलामाई नगरपालिकाको वडा नं. ७ र १३ ले खेलेको छ । वडा नं. १३ ले वडा नं. ७ लाई २ गोलले पछि पार्दै विजयी सुरुवात ग¥यो । वडा नं. ७ ले २ गोल गरेको थियो भने वडा नं. १३ ले ४ गोल गरेको थियो ।
यस्तै दोस्रो खेल वडा नं. १४ र १ का विच भएको थियो । उक्त खेलमा वडा नं. १ विजयी भएको छ । वडा नं. १ ले ४ गोल हान्यो भने वडा नं. १४ ले २ गोल ग¥यो ।
आइतबार ३ वटा खेल हुने छन । पहिलो खेल ११ बजे वडा नं. ५ र ९ का बीचमा हुने छ भने दोस्रो खेल १ बजे वडा नं. ४ र २ का बीचमा हुने छ । यस्तै तेस्रो खेल दिउँसो ३ बजे वडा नं. ८ र १० का बीच हुने आयोजकले जनाएको छ ।
