सिन्धुली / गोलञ्जोर गाउँपालिका वडा नं. ५ चिसापानीको जुनारमा क्युआर कोर्डको प्रयोग गरिएको छ । यहाँको सहकारी मार्फत उत्पादन भएको जुनार लेवलिङ, प्याकेजिङमा क्युआर कोर्डको प्रयोग गरि बजारमा लगिएको छ । बजारलाई व्यवस्थित गर्न र गुणस्तरीयतामा उठ्ने प्रश्नलाई कम गर्न यो प्रविधिको सुरुवात गरिएको हो । गोलञ्जोरको चिसापानीमा रहेको चिसापानी जुनार उत्पादन कृषि सहकारी संस्थाबाट यो प्रविधिको प्रयोग गरिएको छ ।
बजारीकरणलाई व्यवस्थित गर्न, पारदर्शिता कायम गर्न र त्यसको गुणस्तरीयतालाई जाँच्न सहज बनाउन पनि यो प्रविधिको प्रयोग गरिएको प्रधानमन्त्री कृषि आधुनिकीकरण परियोजना जुनार सुपरजोन सिन्धुलीका बरिष्ठ कृषि अधिकृत देवराज अधिकारीले बताए । उनका अनुसार बजारीकरणमा सहजीकरण गर्न सूचना प्रविधिको प्रयोग गरिएको उनले बताएका छन ।
यो प्रविधिको प्रयोगमा सहजीकरण ग्रिन ग्रोथ ग्रुपले गरेको छ । पहिलो चरणमा चिसापानी सहकारीका ३४ वटा बगैंचालाई यो प्रविधिमा समावेश गरिएको छ । क्युआर कोर्डमा समावेश भएका बगैंचाको जुनार टिपेको मिति, प्याकेजिङ मिति, कति दुरी पार गरेर आएको हो ? कहाँबाट आएको हो ? कति उचाईमा फलेको हो ? यी सबै विवरण उपभोक्ताले मोवाईलबाट क्युआर कोर्ड स्क्यान गरेर हेरेपछि थाहा पाउने छन । ‘मोवाईलबाट क्युआर कोर्ड स्क्यान गरेपछि जुनारको बारेमा सबै जानकारी हुने छ यसले उपभोक्ता ठगिने सम्भावना पनि कम सम्भावन हुन्छ,’ ग्रिन ग्रोथ गु्रपका सौरभ ढकालले भने ।
उनका अनुसार यो प्रविधिको प्रयोग गरि गोलञ्जोरको चिसापानीको जुनार ७ मेट्रिक टन काठमान्डौ, दमौली, हेटौडा र चितवनमा बजारीकरण गरि सकिएको छ । यसले अन्तर्राष्ट्रिय बजारमा समेत विश्वास जमाउन सक्ने बताईएको छ । यो प्रविधिमा इन्ट्री भएको जुनारको मिति पुन : सच्चाउन सकिदैन ।
व्लग व्लगको सबै खाले सूचना अटाउने गरि सफ्टवेयरको व्यवस्था गरिएको छ । आगामी वर्षमा फूल फुल्ने समयदेखि जुनारमा प्रयोग भएका मल, औषधि लगाएतका विवरण समेत सफ्टवेयरमा इन्ट्री गरिने भएको छ ।
किसानले जुनार बगैंचाबाट जुनार टिपेपछि, प्याकिङ र लेभलिङ गरेपछि इन्ट्री गर्न सक्ने व्यवस्था गरिएको छ । यो प्रविधिमा ‘जुनारले बगैंचाबाट कति दुरी पार ग¥यो ?! भन्ने कुरा पनि कोर्ड स्क्यान गरेपछि थाहा हुने छ । यो प्रविधिको प्रयोगले बजारीकरणमा गुणस्तरीयतामा आउने प्रश्न कम हुने ढकालले बताए ।
सहकारीका अध्यक्ष योगेन्द्र थापाका अनुसार २० टन जुनार बजारमा पठाएकोमा ७ टनमा लेवलिङ, प्याकेजिङमा क्युआर कोर्डको प्रयोग गरिएको छ । यो प्रविधि नेपालको कृषि क्षेत्रमा नयाँ र पहिलो पटक प्रयोग भएको प्रविधि मानिएको छ । यो कोर्डको प्रयोगपछि धेरैले यसको प्रयोगको बारेमा चासो व्यक्त गरेको प्रधानमन्त्री कृषि आधुनिकीकरण परियोजना जुनार सुपरजोन सिन्धुलीका वरिष्ठ कृषि अधिकृत देवराज अधिकारीले बताए ।
यसैबीच आइतबार जुनार सुपरजोन सिन्धुलीले चिसापानी जुनार उत्पादन कृषि सहकारी संस्थालाई ५० प्रतिशत अनुदानमा लेवलिङ प्याकेजिङ र ग्रेडिङका लागि आवश्यक सामग्री हस्तान्तरण गरेको छ । जिल्ला समन्वय समितिका प्रमुख शंकरराज बर्मा तिवारीले सहकारीका अध्यक्ष योगेन्द्र थापालाई ९ लाख ३४ हजार बरावरको सामग्री हस्तान्तरण गरेका हुन ।
