सिन्धुली । सिन्धुलीको मानवअधिकारको अवस्थाका बारेमा सिन्धुलीमाढीमा समिक्षा गरिएको छ । मानवअधिकार उलंघनका घटनाहरुका पीडितको विश्लेषण गर्दा जिल्लामा महिला र बालिकाहरु बढी प्रभावित भएको समिक्षाका क्रममा प्रतिवेदन प्रस्तुत गरिएको छ ।
अनौपचारिक क्षेत्र सेवा केन्द्र इन्सेकले शुक्रबार सिन्धुलीमाढीमा आयोजना गरेको मानवअधिकार वर्ष पुस्तक २०२१ का लागि संकलित घटनाहरुको पूर्व वार्षिक समिक्षा कार्यक्रममा इन्सेक जिल्ला प्रतिनिधि विमला पाण्डेले एक वर्षको अवधिमा भएका मानवअधिकार उलंघनका घटनामा सबैभन्दा बढी महिला र बालिका प्रभावित भएको प्रतिवेदन सार्वजनिक गरेकी छिन ।
उनले जिल्लामा ११५ वटा मानवअधिकार उलंघनका घटना भएकोमा बालिकाहरु, शिशुहरु र महिलाहरु पीडित भएको बताईन । राज्य भन्दा गैह्र राज्य पक्षबाट हुने घटनाको संख्या बढ्दो रहेको पनि इन्सेक सिन्धुलीले जनाएको छ । यौनजन्य दुव्र्यवहार, बलात्कार जस्ता अपराधमा बालबालिकालाई पीडित बनाईएको पनि इन्सेकले जनाएको छ । एक वर्षमा विभिन्न घटनामा २८ जना बालिका र ३ जना शिशु र ८१ जना महिला पीडित भएको देखिएको प्रतिवेदन सार्वजनिक गर्दै पाण्डेले बताईन ।
इन्सेकले सार्वजनिक गरेको प्रतिवेदनमा बलात्कारपछि रहने गर्भका कारण बालिका तथा महिलाहरु थप समस्या परेको र त्यसको व्यवस्थापनमा समेत समस्या आएको उल्लेख गरिएको छ भने उमेर समूह हेर्दा ४ वर्षदेखि ६७ वर्षसम्मका नागरिकहरु हिंसा प्रभावित भएका देखिएको छ ।
इन्सेकको तथ्यांकमा सन् २०२० भित्र सिन्धुलीमा घरेलु हिंसा ५२, बलत्कार ३०, बाल यौन दुरुपयोग २, बलत्कार प्रयास २, बोक्सीको आरोप ४, अपहरण तथा शरीर बन्धक २, परिवारजनबाट हत्या २, बहुविवाह १४, बालविवाह २ वटा लगाएतका घटना भएको उल्लेख गरिएको छ ।
केहि घटनामा सार्वजनिक पदमा बसेका व्यक्तिहरु र पीडकको दवाव, प्रभाव र प्रलोभनका कारण प्रहरी, प्रशासन, न्यायीक निकाय, अस्पताललाई समेत काम गर्न कठिनाई उत्पन्न भएको पाईएको छ । फौजदारी अभियोगमा दवाव, प्रभाव र प्रलोभनले पीडित पक्षले न्याय पाउन नसकेको, होस्टाइल हुने गरेको पाईएको पाण्डेले बताईन ।
समिक्षामा बोल्दै सहभागिहरुले बालविवाहका घटनाहरु जिल्लामा अत्यधिक रहेको, घटना दर्ताको कानुन, कानुनी उपचारका प्रावधान लगाएतले कानुनी दायरामा ल्याउन समस्या भएको बताउँदै इन्सेकले त्यो तथ्यांकलाई विश्लेषण गरि प्रतिवेदनमा उल्लेख गर्न सुझाव दिएका छन ।
