सिन्धुली । कमलामाई नगरपालिका ५ का विश्वलाल थिङ शारीरिक अपांग हुन । उनी सवारी दुर्घटनामा परि अपांग भएका हुन । ह्विल चियरको माध्यमबाट हिडडुल गर्छन । उनले शरीर सुहाउँदो ह्वील चियर वा सवारी साधन पाएका छैनन । उनी सरकारी कार्यालयहरुमा जाँदा ह्विल चियर जाने भौतिक संरचना नपाउने, शौचालयसम्म ह्विल चियर नपुग्ने, अपांगमैत्री शौचालय नहुने, कार्यालयका कर्मचारी वा हाकिमलाई भेट्न समस्या हुने गरेको बताए ।
उनका अनुसार कार्यालयहरुमा सेवा प्रवाह नै अपांगता मैत्री छैन र भौतिक संरचना अपांगको पहुँचमा नहुने समस्या रहेको छ । स्वास्थ्य उपचारका लागि अस्पतालमा जाँदा समेत दोभासे वा भौतिक संरचनाका कारण काम नहुने गरेको छ ।
यस्तै सिन्धुली बहिरा संघ सिन्धुलीका अध्यक्ष घन बहादुर थापा कान सुन्दैनन । उनी बोल्न पनि सक्दैनन । उनलाई सरकारी सेवा लिन होस वा विद्यालय, बैंक होस वा अस्पताल जहाँ गए पनि सञ्चार गर्न समस्या छ । ती सार्वजनिक स्थलमा दोभाषे नहुदा सञ्चार गर्न समस्या हुने गरेको र सेवा प्राप्त गर्न समेत कठिन भएको उनले बताए । उचित सञ्चारको अभावले सुस्त मनस्थितिका व्यक्तिलाई सेवा प्राप्त गर्न कठिन भएकाले तत्काल सबै कार्यालयमा दोभाषेको व्यवस्था हुनुपर्नेमा उनले जोड दिए ।
उनीहरु जस्तै सिन्धुलीमा रहेका अपांगता भएका व्यक्तिहरुले जिल्लाका सरकारी कार्यालयहरु, सार्वजनिक भौतिक सम्पत्तिहरु र सार्वजनिक सेवाहरु अपांगता मैत्री नभएको गुनासो गरेका थिए । सिन्धुली अपांग महिला संघ सिन्धुलीले २९ औं अन्तर्राष्ट्रिय अपांगता दिवसका अवसरमा आयोजना गरेको अपांगमैत्री भौतिक संरचना र पहुँच सम्बन्धि अन्तक्र्रियामा सहभागि अपांगता भएका व्यक्तिहरुले सार्वजनिक स्थलमा हिड्न, सबैको पहुँचमा पुग्न सहयोग सामग्री र भौतिक संरचना आवश्यक रहने बताएका थिए ।
अपांग महिला संघ सिन्धुलीका अध्यक्ष दिपा देवकोटाले भौतिक संरचनालाई व्यवस्थित गर्नका लागि सरकारले अपांगतामैत्री भौतिक संरचना निर्माणमा कडाई गर्नुपर्ने र अपांगता भएका व्यक्तिका समस्यालाई बुझ्न सोंच परितर्वतन हुनुपर्ने बताईन ।
कार्यक्रममा बोल्दै जिल्ला समन्वय समिति सिन्धुलीका प्रमुख शंकरराज तिवारी बर्माले भौतिक संरचनाहरु अपांगता मैत्री बन्नुपर्नेमा जोड दिए । उनले सबै स्थानीय सरकारले अपांगतामैत्री भौतिक संरचना निर्माणमा कडाई गर्नुपर्ने बताए ।
कार्यक्रममा बोल्दै कमलामाई नगरपालिका सिन्धुलीका उपप्रमुख मञ्जु देवकोटाले अपांगतामैत्री, बालमैत्री र महिला मैत्री संरचना बनाउन सहजीकरण गर्न नगरपालिकाका योजना तथा नक्सा शाखालाइृ अनुरोध गरिएको बताईन । उनले नगरपालिकाको भौतिक संरचना अपांगमैत्री नभएको र संरचना र सेवा प्रवाह अपांगमैत्री बनाउन छलफल भईरहेको बताईन ।
यस्तै प्रमुख जिल्ला अधिकारी योगेन्द्र प्रसाद पाण्डेले जिल्लाका सबै सरकारी कार्यालयहरु अपांगमैत्री नभएकाले भौतिक संरचना अपांगमैत्री बनाउन कार्यालय प्रमुखहरुको नियमित बैठकमा निर्देशन दिने बताए । दिपा देवकोटाको अध्यक्षतामा कार्यक्रम सम्पन्न भएको थियो ।
