सिन्धुली । कार्तिक २४ अर्थात सिन्धुलीगढी विजय उत्सव सोमबार सिन्धुलीगढीमा मनाईएको छ । उच्च सावधानीका बीच स्वास्थ्यका मापदण्ड पालना गरि निश्चित व्यक्तिको उपस्थितिमा मनाईएको २५३ औं विजय उत्सव निरन्तरता र उत्साह विहिन तरिकाले मनाईएको छ ।
विजय उत्सवमा न कुनै बाजा गाजा, न कुनै मानिसको भिडभाड, न कुनै प्रदर्शनी, फोटो खिच्ने रमाउने कुनै पनि काम भएन केबल विगतको निरन्तरता र विरताको सम्झना मात्रका रुपमा मनाईयो ।
कमलामाई नगरपालिका सिन्धुलीको आयोजना तथा नेपाल पत्रकार महासंघ सिन्धुलीको सहयोगमा मनाईएको विजय दिवसमा कुनै रौनकता थिएन । नत आन्तरिक तथा बाह्य पर्यटक नै देखिन्थे ।
हरेक वर्षको कार्तिक २४ गते जस्तो सोमबार सदरमुकामबाट नेपाली झण्डा सहितको सवारी ¥याली पनि भएन । जिल्ला तथा जिल्ला बाहिर कार्यक्रममा कुनै पनि औपचारिक पत्राचार गरिएन । कमलामाई नगरपालिकाका खड्ग खत्रीले दिवसका अवसरमा ठूलो गढीमा झण्डोत्तोलन गरे भने नेपाली सेनाले सलामी अर्पण ग¥यो ।
सुरक्षाकर्मी, केहि जनप्रतिनिधि, केहि कर्मचारी, पत्रकार, तत्कालिन युद्धको नेतृत्व लगाएतका सामान्य उपस्थितिमा कार्यक्रम सम्पन्न गरिएको छ । नीजि सवारी साधनमा स्वेच्छाले पुगेका केहि नागरिकहरु बाहेक कार्यक्रममा बाक्लो उपस्थिति रहेन ।
नेपाल पत्रकार महासंघले वि.सं. १८२४ मा अंग्रेज फौजलाई विश्वमै पहिलो पटक परास्त गरेको सम्झनामा वि.सं. २०६७ सालदेखि यो उत्सव मनाउन थालेको हो । विजय उत्सव मनाउन थालेको ११ औं वर्ष भईसकेको छ ।
सिन्धुलीगढीमा झण्डोत्तोलन गर्दै कमलामाई नगरपालिकाका मेयर खड्ग खत्रीले नेपाली सेना, आम नागरिकको सहयोगमा सिन्धुलीगढीको वृहत्तर विकासको काम भईरहेको बताए । उनले सिन्धुलीगढी संग्राहलय निर्माण, सिन्धुलीगढी युद्धका योद्धाहरु, बंशु गुरुङ, बंशुधर पाण्डे लगाएतका ६ वटा नायकको शालिक निर्माणको टेन्डर भईसकेकोले त्यसको काम पुस अन्तिमसम्म सकिने बताए । त्यस्तै समाधि पार्क निर्माण, रानी दरबार निर्माण लगाएतका काम समेत अगाडि बढेको बताए ।
उनले सिन्धुलीगढीको ऐतिहासिक, पुरातात्विक महत्व नमर्ने गरि पुनःनिर्माण भईरहेको बताए ।
यस्तै गढीमा गोर्खाली सेनालाई उच्च सम्मान मिलेको बताउँदै इतिहास संरक्षणको काम उच्च सम्मानका साथ सबैको सहयोगमा गर्नृपर्ने बताए । उनले गोर्खाली फौजको गर्विलो इतिहास सिन्धुलीगढीले बोकेको बताए । कार्यक्रममा कमलामाई नगरपालिकाका उपमेयर मञ्जु देवकोटाले उपस्थित व्यक्तिहरुलाई स्वागत गरेकी थिईन भने नेपाल पत्रकार महासंघ सिन्धुलीका अध्यक्ष होम कुमार कार्कीले धन्यावाद ज्ञापन गरेका थिए ।
पुर्खाको सम्झनामा स्वास्थ्य सामग्री
सिन्धुलीगढी विजय उत्सव मनाउन तनहुँबाट आएका तत्कालिन शिकारी सरदार बंशु गुरुङका सन्तानले कमलामाई नगरपालिकालाई स्वास्थ्य सामग्री हस्तान्तरण गरेका छन ।
केहि वर्षदेखि कार्तिक २४ मा पुर्खाको गौरवपूर्ण इतिहासको सम्झनामा मनाईने विजय उत्सवमा सिन्धुली आउने गरेका उनीहरुले यो वर्ष कोरोना महामारीमा पनि सिन्धुली आए । उनीहरुले विजय उत्सवको कार्यक्रममै कमलामाई नगरपालिकाका प्रमुख खड्ग खत्रीलाई ४० हजार बराबरको स्वास्थ्य सामग्री हस्तान्तरण गरेका छन ।
बंशु गुरुङ प्रतिष्ठानका क्याप्टेन लालजंग गुरुङले उक्त स्वास्थ्य सामग्री हस्तान्तरण गरेका हुन । उनी सहित ६ जनाको टोली सिन्धुलीगढी विजय उत्सवमा आएका थिए ।
