सिन्धुली । नेपाल पत्रकार महासंघ सिन्धुलीले महासंघको सदस्यहरुलाई एक वर्षको नविकरण छुट दिने भएको छ । महासंघले आफ्ना सदस्यहरुको एक वर्षको नविकरण शुल्क व्यहोरी सदस्यहरुलाई छुट दिने निर्णय गरेको हो ।
महासंघ जिल्ला शाखाको विहिबार बसेको कार्य समितिको वैठकले कोभिड १९ का कारण पत्रकारहरु आर्थिक संकटमा परेको निश्कर्ष निकाल्दै एक वर्षको सदस्यता नविकरण गरिदिने भएको हो ।
पत्रकारहरु कोभिड १९ का कारण आर्थिक संकटमा परेको ठहर गर्दै बैठकले एक वर्षको सदस्यता शुल्क मिनाहा गरेको हो । नविकरणका लागि अन्य वर्षको रकम तिर्ने पत्रकारले मात्र एक वर्षको सदस्यता शुल्क मिनाहा पाउने छन र शाखाले एक वर्षको रकम थपेर नविकरण गरिदिने भएको महासंघका सचिव विदुर पौडेलले बताएका छन ।
५४ जना सदस्यहरु महासंघ जिल्ला शाखामा आवद्ध रहेका छन । नेपाल पत्रकार महासंघले साउन मसान्तसम्ममा सदस्यता नविकरण गर्ने मिति तय गरेको छ । जिल्ला शाखा सदस्यहरुले शनिबारसम्मका लागि सदस्यता नविकरणको लागि सदस्यता शुल्क बुझाउनु पर्ने छ ।
यस्तै शाखा अध्यक्ष राजन कार्कीको अध्यक्षतामा बसेको कार्य समितिको बैठकले कोभिड १९ को संक्रमणको जोखिममा पत्रकारहरु रहेकाले कोभिडका कारण पत्रकारहरुलाई पर्ने समस्या समाधान गर्न जिल्लाका सबै स्थानीय तहसँग समन्वय गर्ने निर्णय गरेको छ ।
