सिन्धुली । संघिय संसदको कृषि सहकारी तथा प्राकृतिक स्रोत समितिले जिल्लाको वैज्ञानिक वन बनाईएका सामुदायिक वनमा अनियमितता नभएको ठहर गरेको छ । वैज्ञानिक वनको अवस्थाको बिषयमा स्थलगत अनुगमन गरेको समितिले जिल्लाका सरोकारवालासँग पनि छलफल गरेको छ ।
कृषि सहकारी तथा प्राकृतिक स्रोत समितिकी सभापति पूर्ण कुमारी सुवेदीको नेतृत्वमा अनुगमनका लागि आएको टोलीले अनुगमनसँगै जिल्लाका सरोकारवाला निकायसँग डिभिजन वन कार्यालयमा अन्र्तक्रिया गरेको छ ।
वैज्ञानिक वन लागु भएका सामुदायिक वनहरुमा वन विनाश भएको गुनासो आएपछि कृषि सहकारी तथा प्राकृतिक स्रोत समितिले वैज्ञानिक वन लागु भएका जिल्लाहरुमा रहेका सामुदायिक वनहरुको अवस्थाको विषयमा स्थलगत अनुगमन गर्ने क्रममा सिन्धुलीमा पनि अनुगमन गरेको हो ।
अनुगमनका क्रममा तराईका जिल्लाहरुको तुलनामा सिन्धुलीमा मापदण्ड विपरित रुखहरु काटेको नपाईएको समितिले जनाएको छ । स्थलगत अवलोकनपछि समितिका संयोजक सुवेदीले कैलाली, कञ्चनपुरमा जुन रुपमा वैज्ञानिक वनको नाममा फडानी भएको थियो, त्यो अवस्था सिन्धुलीमा नदेखिएको बताइन ।
वैज्ञानिक वनको नाममा केहि स्थानमा वदमासी भएको पाइएको भए पनि सिन्धुलीमा त्यस्तो नदेखिएको उनले बताईन । वैज्ञानिक वन लागु भएर कटान भएको स्थान आएर हेर्दा माउ रुख र पुनः उत्पादनको अवस्था पनि सन्तोष जनक पाइएको समितिका सदस्यहरुले बताए । जिल्लाका ८७ वटा सामुदायिक वनमा वैज्ञानिक वन कार्यक्रम लागु भएका छन ।
अनुगमनमा समितिका सदस्यहरु घनश्याम खतिवडा, राज बहादुर बुढा क्षेत्री, शान्ता चौधरी र शान्तिमाया पाख्रिन आएका थिए ।
यस्तै समितिले संसद गणेश कुमार पहाडी, वागमति प्रदेशसभा सदस्य प्रदिप कटुवाल, कमलामाई नगरपालिका प्रमुख खड्ग बहादुर खत्री, उपप्रमुख मञ्जु देवकोटा, सामुदायिक वन उपभोत्ता महासंघ, जिल्ला महासंघ सिन्धुलीका अध्यक्ष हितलाल श्रेष्ठ, महासंघका प्रदेश उपाध्यक्ष कृष्णकुमार श्रेष्ठ, विभिन्न सामुदायिक वनका उपभोक्ता तथा पदाधिकारीहरुसँग अन्तक्र्रिया समेत गरेको छ ।
