सिन्धुली । हातेमालो साना किसान कृषि सहकारी संस्थाले २०७७/०७८ का लागि नीति तथा कार्यक्रम सहितको बजेट प्रस्तुत गरेको छ । सहकारीका अध्यक्ष राम बहादुर विश्वकर्माले सहकारीको ८ करोड २० लाखको बजेट सहितको कार्यक्रम प्रस्तुत गरेका हुन । अध्यक्ष विकले किसानलाई मल विउ उपलब्ध गराउने, सहकारी मार्फत उद्यमीहरु उत्पादन गरि कृषिमा रोजगारी सृजना गर्ने देखि एम्बुलेन्स खरिद, साना किसानलाई लक्षित गरि स्वास्थ्य सेवा सञ्चालन गर्ने देखि यातायात सेवा सञ्चालन गर्ने सम्मको कार्यक्रम प्रस्तुत गरेका छन ।
सहकारीले संस्थाको दिर्घकालिन तथा बहुवर्षिय योजना अन्तर्गत ३ वर्षभित्र एम्बुलेन्स सेवा, ५ वर्ष भित्र स्वास्थ्य सेवा र ४ वर्ष भित्र यातायात सेवा दिने गरि कार्यक्रम तय गरेको छ । यस्तै २ वर्षभित्र कोल्ड रुम स्थापना गर्ने, कृषि ढुवानी सेवा सुरु गर्ने, ३ वर्षभित्र कृषि सूचना बैंक स्थापना गर्ने, ५ वर्षभित्र कृषि संग्रहालय स्थापना गर्ने गरि कार्यक्रम तय गरेको छ । जसका लागि ४५ हजार रुपैंया बजेट परियोजना विश्लेषणका लागि छुट्याईएको बजेट वक्तव्यमा उल्लेख गरिएको छ ।
सहकारीहरुले साधारणसभामा नीति तथा कार्यक्रम प्रस्तुत गर्ने र सोहि साधारणसभाको म्यान्डेट अनुसार कार्यक्रम गर्ने नियमिततालाई तोड्दै सरकारको जस्तो गरि शुक्रबार साना किसान बजेट वक्तव्य जारी गरेको सहकारीले सहकारीका किसानलाई भैंसी फारम खोल्ने, माछा पाल्ने लगाएतका कार्यक्रम समेत तय गरेको छ ।
सहकारी भित्रका किसानका उत्पादनलाई बजारसम्म जोड्न चिस्यान केन्द्र निर्माण गर्ने, दुध डेरीलाई व्यवस्थित गर्ने, सहकारीका सदस्यहरुको उत्पादनलाई बजारसम्म ल्याउन कृषि ढुवानी सेवा सञ्चालन गर्ने लगाएतका कार्यक्रम तय गरिएको छ ।
संस्थाका अध्यक्ष राम बहादुर वि.क.को अध्यक्षता एवम् वाग्मति प्रदेश सभा सदस्य विनोद खड्काको प्रमुख आतिथ्यतामा प्रस्तुत गरिएको बजेट बक्तव्यमा ५ सय ४८ जना किसानलाई उद्यमी बनाउने लक्ष्य लिईएको छ । यसियाली विकास बैंकको लगानीमा दुई वटा भैसी पालनका लागि फारम खोल्ने र ति फारमलाई २ करोड लगानी गर्ने, माछा पालनका लागि २० लाख लगानी गर्ने सहकारीले जनाएको छ ।
यस्तै सहकारीले सुत्केरी पोषण कार्यक्रम समेत लागु गर्ने भएको छ । सहकारीले सुत्केरी पोषण कार्यक्रमका लागि ५० हजार बजेट विनियोजन गरेको छ । सहकारीको कार्यक्षेत्रका सुत्केरी महिलालाई पोषण दिन जाँदा बच्चाको निशुल्क खाता खोल्ने र सुत्केरी आमाको खाता समेत खोल्ने गरि कार्यक्रम तय गरिएको छ । यस्तै सहकारीले पर्व र दर्द कोषको स्थापना गर्ने भएको छ । सहकारीको १ लाख विउपूजी र प्रत्येक सदस्यबाट १ सय रुपैंया उठाई पर्व र दर्द कोष स्थापना गरिने बजेटमा उल्लेख गरिएको छ ।
कार्यक्रममा बोल्दै प्रदेशसभा सदस्य विनोद खड्काले सिन्धुलीमा कृषि अनुदान दुरुपयोग भएको बताउँदै काम गर्ने सहकारी मार्फत मात्र लगानी गर्न आवश्यक रहेको बताए । किसानको आवश्यकतालाई मध्येनजर नगरि अनुदान दिदा कृषिको लगानी दुरुपयोग भएको उनले बताए ।
कार्यक्रममा कमलामाई नगरपालिका सिन्धुलीका उपमेयर मञ्जु देवकोटाले स्थानीय सरकारले राम्रो काम गरिरहेका सहकारीसँग नगरपालिका सहकार्य गरेर जान सक्ने बताईन । कमलामाई नगरपालिकाका वडा नं. १ का वडा अध्यक्ष महेशराज खतिवडाले सहकारीले पारदर्शिता र जवाफदेहितालाई ध्यान दिदै किसान लक्षित कार्यक्रम अगाडि ल्याउनुपर्नेमा जोड दिए ।
कार्यक्रममा बोल्दै नेपाल पत्रकार महासंघ सिन्धुलीका उपाध्यक्ष बिमला पाण्डेले कृषि सहकारीले स्वास्थ्य र यातायात क्षेत्रमा कार्यक्रम बनाउँदा लक्ष्य र उद्देश्य नमिल्ने बताउँदै विषय बाहिर गरिने कार्यक्रमले राम्रा कामको आलोचना हुने बताईन । उनले विषय र उद्देश्यलाई ख्याल गरि कार्यक्रम बनाउन उचित हुने सुझाव दिईन ।
