सिन्धुली । सुनकोशी गाउँपालिका सिन्धुलीले गाउँपालिका भित्रका व्यापार व्यवसाय खोल्नका लागि मापदण्ड तय गरेको छ । शुक्रबार गाउँपालिकामा बसेको सर्वदलिय सर्वपक्षिय बैठकले गाउँपालिकाले तय गरेको मापदण्ड भित्र रहेर व्यवसाय सञ्चालन गर्न अनुमति दिने निर्णय गरेको हो ।
गाउँपालिका अध्यक्ष दिपा बोहोरा दाहालको अध्यक्षतामा बसेको बैठकले ५, ५ दिनमा अनुगमन गर्ने गरि मापदण्डमा रहेर व्यवसाय सञ्चालन गर्न दिने निर्णय गरेको गाउँपालिकाले जनाएको छ ।
मापदण्ड अनुसार व्यवसाय नगर्नेहरुको व्यवसाय बन्द गराई संक्रमण ऐन अनुसार कारवाहि गर्ने समेत गाउँपालिकाले निर्णय गरेको हो । व्यवसाय अनुगमनका लागि गाउँपालिकाका अध्यक्ष दिपा बोहोरा दाहालको संयोजकत्वमा अनुगमन समिति समेत बनाईएको छ ।
गाउँपालिकाले व्यवसायीले अनिवार्य रुपमा ग्लोब्स, मास्क र सेनिटाईजर प्रयोग गर्नुपर्ने, व्यवसायको अगाडि व्यवसायीले साबुन पानी सहितको हात धुने व्यवस्था गरेको हुनुपर्ने, भौतिक दुरी कायम गर्नुपर्ने, सबै व्यवसायीले जानकारीमूलक सूचना पाटी आफ्नो व्यवसायको अगाडि टाँस गरेको हुनुपर्ने, नगद कारोबार गर्दा प्रयोगमा आएको मुद्रालाई सेनिटाईज गर्नुपर्ने, होटल व्यवसायीले प्याकिङ खाना सुरक्षित साथ उपलब्ध गराउने र यात्रीहरुलाई होटल, पसल, मेडिकल तथा भेटेनरीमा भित्र प्रवेश गर्न नदिई बाहिरबाटै सेवा उपलब्ध गराउने गरि मापदण्ड तय गरिएको गाउँपालिका अध्यक्ष दाहालले बताईन ।
यस्तै बैठकले गाउँपालिकाका २ स्थानमा क्वारेन्टाईन स्थापनाका लागि पहल गर्ने निर्णय गरेको छ । गाउँपालिकाको वडा नं. ३ मा रहेको सुनकोशी क्याम्पस र वडा नं. ५ मा रहेको निमावि परेवाडाँडाको भवन विद्यालय प्रशासनसँग समन्वय गरि कोभिड १९ नियन्त्रण तथा उपचारका लागि प्रयोग गर्ने निर्णय गरिएको छ ।
