सिन्धुली । कमलामाई नगरपालिकाका सबै विद्यालयको नतिजा बैशाख १८ गते सम्म प्रकाशन गरिसक्ने नगर शिक्षा समितिले निर्णय गरेको छ । नगरपालिकाको शिक्षा समितिको शनिबार सिन्धुलीमाढीमा बसेको बैठकले नगरभित्रका सबै विद्यालयले बैशाख १८ गतेसम्म नतिजा प्रकाशन गर्नुपर्ने निर्णय गरेको हो । 
नगरपालिकाले नगरभित्रका सामुदायिक तथा संस्थागत विद्यालयको नतिजा सार्वजनिक गर्ने निर्णय गरेको हो ।
नगरप्रमुख एवम् शिक्षा समितिका संयोजक खड्ग खत्रीको अध्यक्षतामा बसेको बैठकले कक्षा ८ को नतिजा पनि तत्कालै प्रकाशन गर्ने निर्णय गरेको हो ।
कोरोना संक्रमण त्रास र लकडाउनका कारण परीक्षा सकिए पनि हालसम्म नतिजा प्रकाशन भएका छैनन भने कतिपय विद्यालयले सबै विषयको अन्तिम परीक्षा समेत लिन सकेका छैनन ।
शैक्षिक सत्रको सुरु गर्न समेत ढिलाई भइरहेको भन्दै नगर समितिको बैठकले जिल्लाका स्टेशनरीहरुलाई यथासिघ्र पाठ्यपुस्तक उपलब्ध गराउन अनुरोध गर्ने समेत निर्णय गरेको छ ।
सञ्चार सम्भाव्यताको अध्ययन गरिने
कमलामाई नगरपालिकाले शैक्षिक सत्रको कक्षा सञ्चालनका लागि अध्ययन गर्ने भएको छ । नगरपालिकाका विद्यालयमा पठनपाठन सञ्चालन गर्नका लागि सञ्चार पहुँचको सम्भाव्यताको अध्ययन गरिने भएको हो । नगरभित्रका सामुदायिक तथा संस्थागत विद्यालयको रेडियो, टेलिभिजन, इन्टरनेटको पहुँचको अध्ययन गर्ने निर्णय गरेको हो । कोरोना संक्रमणको अवस्थामा समेत पढाईलाई निरन्तरता दिने योजना अनुसार नगर समितिले अध्ययन गर्ने भएको हो ।
