सिन्धुली । कारागार कार्यालय सिन्धुलीमा कैदी बन्दीको नियमित स्वास्थ्य जाँचमा समस्या भएको छ । ५० जनाको क्षमता रहेको उक्त कारागारमा २८८ जना कैदी बन्दी छन । २०२९ सालमा बनेको उक्त कारागारमा सरकारले भने २५ जनाको क्षमताको स्वीकृती दिएको छ ।
कारागार कार्यालयले केहि वर्ष यता कैदी बन्दीको चाप बढेपछि आन्तरिक रुपमा क्षमता बढाएर कारागारले ५० जनाको क्षमता बनाए पनि कैदी बन्दीको चाप अत्यधिक भएकाले समस्या भएको छ ।
लकडाउनका कारण कारागारमा कैदी बन्दीको व्यवस्थापनमा केहि कठिनाईहरु समेत आएका छन । सरकारले सामाजिक तथा शारीरिक दुरी कायम गर्न लकडाउन गरेको भए पनि यहाँका कैदी बन्दीले भने सामाजिक दुरी कायम गर्न पाएका छैनन । भने आन्तरिक रुपमा स्वास्थ्य जाँचको सुविधा समेत पाउन सकेका छैनन ।
हेल्थ असिस्टेन्टको दरबन्दी रहेको उक्त कारागारमा लकडाउनको समयमा स्वास्थ्य कर्मचारी घर गएपछि दुरी कायम गरि स्वास्थ्य जाँचको सुविधा पाउनबाट बञ्चित भएका हुन । २०७६ असोजदेखि सरकारले दरबन्दीमा कर्मचारी पठाउन नसकेकोमा माघ १९ गते सप्तरीको राजविराज.घर भएका महेशचन्द्र झालाई दरबन्दीमा पठाएको थियो । उनी पनि श्रीमति विरामी परेर फागुन २६ गते घर गएपछि कार्यालयमा आएका छैनन । जसले कैदी बन्दीको नियमित स्वास्थ्य जाँचमा समस्या आएको हो ।
लकडाउनको कारण देखाउँदै उनी कार्यालय नआएपछि कैदी बन्दीको नियमित चेकजाँच प्रभावित भएको कारागार कार्यालयले जनाएको छ । कार्यालयका अनुसार कैदी बन्दी विरामी भए भने सिन्धुली अस्पतालमा विरामी जाँचका लागि लानुपर्ने अवस्था छ ।
आन्तरिक स्वास्थ्य जाँचको व्यवस्था नहुदा भिडभाडमा बस्ने र कारागार बाहिर मानिसको सम्पर्क बढी हुने सिन्धुली अस्पतालमा स्वास्थ्य जाँच गर्दा कोरोना संक्रमण हुन सक्ने आशंकाले कारागार व्यवस्थापनलाई समस्या भएको छ ।
कारागार कार्यालयले स्वास्थ्य सम्बन्धि केहि सावधानी अपनाएको भए पनि कैदी बन्दीको दुरी कायम गराउन भने ठाउँको अभाव भएको छ । नयाँ कैदी बन्दी आउँदा सिन्धुली अस्पतालमा स्वास्थ्य जाँच गरेर मात्र कारागारमा ल्याउने व्यवस्था कारागारले गरेको छ ।
शंकास्पद विरामीका लागि छुट्टै क्वारेन्टाईनमा राख्ने व्यवस्था स्वरुप कैदी बन्दी भवन भित्र छुट्टै बस्ने व्यवस्था त गरिएको छ तर संक्रमण बढेमा त्यसले सबैलाई फैलन सक्ने खतरा भने रहन्छ । कारागारले हात धुने, मास्क लगाउने, सेनिटाईजरले हात सफा गर्न लगाउने लगाएतका विधि अबलम्बन गरिरहेको र सक्दो व्यवस्थापनमा जोड दिईएको कारागार कार्यालयका प्रमुख मातृका पहाडीले बताए ।
उनका अनुसार प्रयाप्त ठाउँ र आन्तरिक चेकजाँचका लागि स्वास्थ्यकर्मी नहुदा कैदी बन्दीलाई सामाजिक शारीरिक दुरी कायम गरेर राख्न भने सकिएको छैन । सामान्य उपचार गर्नका लागि समेत सिन्धुली अस्पतालमा लानुपर्ने अवस्थाले कैदी बन्दीमा कोराना संक्रमण हुन सक्ने सम्भावना पनि हुन सक्ने जोखिम बढेको छ ।
कारागार कार्यालय सिन्धुलीको ५ सय कैदी बन्दीको क्षमता सहितको अत्याधुनिक भवन निर्माणको काम नसकिएकाले पनि कैदीबन्दीलाई पुरानै भवनमा राख्नु परेको कारागार प्रशासनले जनाएको छ । पुरानो भवन र कम क्षमताको भएकाले सामाजिक शारीरिक दुरी कायम गराउन अप्ठ्यारो भएको हो ।
उक्त कार्यालयमा थुनुवा पुरुष १२५ र महिला ३ गरि १२८ जना छन भने कैद तोकीएका ९८ जना पुरुष र २ जना महिला गरि १ सय जना रहेका छन ।
