सिन्धुली । कोभिड १९ संक्रमण व्यवस्थापनका लागि जिल्लाका सबै स्थानीय तहमा संकट व्यवस्थापन केन्द्रको स्थापना गरिने भएको छ । जिल्ला विपद व्यवस्थापन समिति सिन्धुलीको शुक्रबार सिन्धुलीमाढीमा बसेको बैठकले जिल्लाका सबै स्थानीय तहमा संकट व्यवस्थापन केन्द्र स्थापना गर्ने निर्णय भएको हो ।
प्रधानमन्त्री तथा मन्त्रि परिषदको कार्यालयको चैत २० गतेको पत्राचार अनुसार सबै स्थानीय तहमा संकट व्यवस्थापन केन्द्र स्थापना गर्ने निर्णय भएको विपद व्यवस्थापन समिति सिन्धुलीले जनाएको छ ।
पालिकाका प्रमुख अध्यक्ष, प्रमुख प्रशासकीय अधिकृत, पालिकाका स्वास्थ्य संयोजक र सुरक्षा निकायका प्रतिनिधि सदस्य रहने गरि केन्द्र स्थापना गर्ने निर्णय भएको हो ।
यस्तै सिन्धुलीमा राहत वितरण गर्न चाहाने निकाय, संघसंस्था र व्यक्तिले राहत दिन चाहेमा स्थानीय तहसँग समन्वय गर्ने र सरकारले तोकेको मापदण्ड अनुसारको राहत भएमा मात्र उक्त राहत लिई वडास्तरीय समिति मार्फत उक्त राहत वितरण गरि एकरुपता कायम गर्ने निर्णय बैठकले गरेको छ ।
प्रमुख जिल्ला अधिकारी योगेन्द्र प्रसाद पाण्डेको अध्यक्षतमा बसेको बैठकले प्रत्येक स्थानीय तहका लागि आवश्यक पर्ने अत्यावश्यक खाद्य पदार्थको मौज्दातको विवरण लिई खाद्य पदार्थको अभाव हुन नदिन सम्बन्धित स्थानीय तहबाट विशेष पहल गर्ने निर्णय समेत गरेको छ ।
