सिन्धुली । सामुदायिक वन उपभोक्ता महासंघ नेपाल, जिल्ला महासंघ सिन्धुलीले विश्वव्यापी महामारी कोभिट–१९ (कोरोना भाईर) बाट बचाउन राहत तथा उपचारको लागि सिन्धुली अस्पताल र कमलामाई नगरपालिकालाई आर्थिक सहयोग गरेको छ ।
महासंघले सिन्धुली अस्पताललाई एकलाख एघार हजार एकसय एघार रुपैंया सहयोग गरेको छ । मंगलबार महासंघका अध्यक्ष हितलाल श्रेष्ठ र बाग्मति प्रदेश उपाध्यक्ष कृष्णकुमार श्रेष्ठले सिन्धुली अस्पताल विकास समितिका अध्यक्ष प्रलाद कुमार पोख्रेललाई चेक हस्तान्तरण गरेका हुन ।
त्यस्तै कमलामाई नगरपालिका विभिन्न सामुदायिक वन समूहहरुबाट संकलन भएको पचहत्तर हजार रकम कमलामाई नगरपालिकाका प्रमुख खड्गबहादुर खत्रीलाई हस्तान्तरण गरिएको छ ।
नगरपालिकाको प्रकोप व्यवस्थापन कोषका लागि उक्त रकम हस्तान्तरण गरिएको सामुदायिक वन उपभोक्ता महासंघ जिल्ला महासंघ सिन्धुलीले जनाएको छ ।
कमलामाई नगरपालिकालाई जिल्ला महासंघको समन्वयमा सरस्वती सामुदायिक वन उपभोक्ता समूहबाट २० हजार, कमलामाई सामुदायिक वन उपभोक्ता समूहबाट २० हजार, कमलाजी जन्मस्थान सामुदायिक वन उपभोक्ता समूहबाट १५ हजार र दक्षिणकाली सामुदायिक वन उपभोक्ता समूहबाट २० हजार रकम प्राप्त भएको थियो ।
कोभिड–१९ महामारीमा संक्रमण, रोकथाम र उपचारका लागि उक्त रकम हस्तान्तरण गरिएको महासंघका अध्यक्ष हितलाल श्रेष्ठले बताए ।
हालसम्म सिन्धुली अस्पतालको राहत कोषमा ४ लाख ५० हजार रकम संकलन भएको अस्पताल विकास समितिका अध्यक्ष पोख्रेलले बताएका छन । उनका अनुसार करिब डेढलाख बढीको सामान समेत अस्पताललाई सहयोग प्राप्त भएको छ । अस्पतालले उक्त रकम कोरोना संक्रमण व्यवस्थापन र उपचारका लागि औषधि तथा उपकरण खरिद तथा व्यवस्थापनमा लगानी गर्ने पोखरेलले बताए ।
