सिन्धुली । सिन्धुली अस्पतालले भारतबाट नेपाल फर्केका कमलामाई नगरपालिका वडा नं. २ का १९ वर्षिय युवालाई आइसोलेसनमा भर्ना गरेको छ । सिलगुढीबाट सोमबार घरमा आएका उनलाई खोकी लागेपछि आइसोलेसनमा भर्ना गरिएको हो ।
उनलाई सिलगुढीमै ज्वरो आएर सञ्चो भई सिन्धुली आएको तर सिन्धुली फर्केपछि खोकी लागेकाले चेकजाँचका लागि सिन्धुली अस्पतालमा आएका थिए । उनको स्वास्थ्य अवस्था सामान्य भएको सिन्धुली अस्पतालका डा. प्रसन्न राजभण्डारीले बताए । उनका अनुसार युवाको स्वाव परिक्षणका लागि नमुना संकलन गरि टेकु अस्पताल पठाईएको राजभण्डारीले बताए । उनका अनुसार नमुना काठमान्डौ पुगेको ४८ घण्टा पछि मात्र उनको रिपोर्ट आउने छ ।
यस्तै भारतमा रोजगारीमा गएर फर्केका १० जना युवाहरुलाई मंगलबार होम क्वारेन्टाईनमा राखिएको छ । उनीहरु भारतको सिन्धुलीमा होम क्वारेन्टाईन पूर्ण रुपमा सञ्चालनमा नआएकाले उनीहरुलाई होम क्वारेन्टाईनमा राखिएको हो ।
उनीहरुलाई स्थानीयले घरमा बस्न नदिएपछि सिन्धुली अस्पतालमा स्वास्थ्य परिक्षणका लागि आएका थिए । उनीहरुले क्वारेन्टाईनमा बस्न रुचि देखाएपछि अस्पतालले होम क्वारेन्टाईनमा राख्न सिफारिस गरेको हो ।
राजस्थानमा रोजगारीका लागि गएका २० देखि ३० वर्ष उमेर समूहका युवाहरु रहेको सिन्धुली अस्पतालका डा. राजभण्डारीले बताए । उनीहरुमा कोरोनाको कुनै पनि लक्षण छैन तर सतर्कताका लागि क्वारेन्टाईनमा राखिएको हो ।
फिवर इमर्जेन्सी सुरु
सिन्धुली अस्पतालले २ वटा आपतकालिन सेवा (इमर्जेन्सी) सुरु गरेको छ । २ दिन अघिदेखि फिवर क्लिनिक चलाएको अस्पतालले ज्वरो र शंकास्पद विरामी बढ्न थालेपछि फिवर इमर्जेन्सी सुरु गरेको हो । अस्पतालमा नियमित सञ्चालनमा रहेको इमर्जेन्सी र फिवर इमर्जेन्सीबाट काम थालिएको छ । ज्वरोका विरामीको चाप बढ्नुक साथै कोभिड १९ को संक्रमण हुन सक्ने भएकाले अन्य आपतकालिन विरामीको सुरक्षाका लागि २ वटा इमर्जेन्सी सुरु गरिएको डा. राजभण्डारीले बताए ।
इक्युपमेन्टको अभाव
सिन्धुली अस्पतालमा आवश्यक पर्ने प्राविधिक र औजारको अभाव भएको छ । आपतकालिन अवस्थामा आवश्यक पिपीई सेटकै अभावका कारण समस्या हुने भएको अस्पतालका मेडिकल सुपरिटेन्डेन डा. लक्ष्मण खड्काले बताए ।
उनका अनुसार विरामीको चाप बढेमा वा कोभिड १९ को संक्रमण बढेमा स्वास्थ्यकर्मी नै सुरक्षित हुन नसक्ने भएको बताए । उनका अनुसार सिन्धुली अस्पतालले विरामीको चापलाई घटाएर आइसोलेसन वार्ड थप्ने योजना बनाएको छ तर पर्याप्त श्रोत साधन नहुदा समस्या भएको बताए ।
इमर्जेन्सी अवस्थामा हामीले लगाउने ड्रेस समेत छैन । विरामीको उपचार निर्धकसँग गर्न सक्ने अवस्था नरहेकाले सबैको ध्यान जानुपर्ने बताए ।
क्वारेन्टाईन तयार हुन समय लाग्ने
सिन्धुली जिल्लामा मंगलबारदेखी 39 वेडको क्वारेन्टाईन सुरु भएको छ । नेपाली सेनाको वर्द बहादुर गण, कमलामाई नगरपालिका, नेपाल रेडक्रस सोसाईटी सिन्धुली र सिन्धुली अस्पतालको समन्वय र सहयोगमा क्वारेन्टाईन सुरु गरिएको हो । तर क्वारेन्टाईनलाई आवश्यक पर्ने सबै सामानहरु नभएकाले क्वारेन्टाईनमा विरामी राखिएको छैन ।
क्वारेन्टाईन व्यवस्थापनका लागि समिति निर्माण समेत नभएकाले पनि यसको व्यवस्थापनमा समस्या आएको वर्द बहादुर गणका गणपति राजीव थापाले बताए । बेड सेनाले हालिसकेको भए पनि न्युनतम आधारभूत कुरा समेत अभाव भएकाले समस्या भएको उनले बताए । क्वारेन्टाईन सञ्चालनमा आउन केहि दिन लाग्ने थापाले बताए ।
