सिन्धुली । कमलामाई नगरपालिका अन्तर्गत कोरोना भाईरसबाट हुने असरलाई कम गर्नका लागि सोमबार गठित कार्यदलले नगरपालिकामा तत्कालका लागि ५० शैयाको क्वारेन्टाईन तयारी अवस्थामा राख्ने निर्णय गरेको छ ।
कार्यदलका संयोजक एवम् कमलामाई नगरपालिकाका मेयर खड्ग खत्रीको अध्यक्षतामा बसेको बैठकले उक्त निर्णय गरेको हो । नगरपालिकाले भुसंरक्षण कार्यालय रहेको भवन र कर्मचारी मिलन केन्द्रको भवनमा क्वारेन्टाईन स्थापना गर्ने निर्णय भएको हो ।
क्वारेन्टाईनका लागि आवश्यक सामग्रीहरु कमलामाई नगरपालिका, नेपाल रेडक्रस सोसाईटी सिन्धुली, वर्द बहादुर गण ठूलिटार र सिन्धुली अस्पतालले व्यवस्था गर्ने निर्णय भएको छ ।
उक्त बैठकले क्वारेन्टाईन निर्माणका लागि कमलामाई नगरपालिकाबाट म्याट्रेस, पिभिसी कार्पेट, सिरानी, तौलिया, ब्रस मञ्जन, स्यानिटाईजर र चप्पल उपलब्ध गराउने, नेपाल रेडक्रस सोसाईटीले बाल्टिन, जग, साबुन बट्टा सहित, तन्ना, व्लांकेट, झुल, बाटा उपलब्ध गराउने, बर्दबहादुर गणले खाट, सिन्धुली अस्पतालले औषधि, खाना र पानीको व्यवस्था कमलामाई नगरपालिका र होटल व्यवसायीले गर्ने निर्णय भएको छ ।
यस्तै क्वारेन्टाईनमा प्राविधिक सहयोग सिन्धुली अस्पतालले गर्ने र क्वारेन्टाईन व्यवस्थापनको काम वर्दवहादुर गणले लिएको छ । जसको आजैदेखि सुरु भएको छ ।
