सिन्धुली । नेपाल आदिवासी जनजाति पत्रकार महासंघ (फोनिज) को राष्ट्रिय भेला आइतबारदेखि सिन्धुलीको खनियाँखर्कमा सुरु भएको छ । ‘संचारमा समावेसीता – कानुन चाहियो, ब्यवहारमा पनि !’ भन्ने मुलनाराका साथ भेला सुरु भएको हो । खनियाँखर्कको चेतना भिलेजमा भेला सुरु भएको छ । भेलाको अवसरमा आइतबार आदिवासी जनजातिको सवाल र संचार माध्यमको भूमिका बिषयमा अन्र्तक्रिया गरिएको छ ।
कार्यक्रममा पत्रकार महासंघका अध्यक्ष गोविन्द आर्चायले आदिवासी जनजाति पत्रकारहरुको समस्याहरुलाई संस्थागत रुपमा समाधान गर्न पहल गर्ने प्रतिवद्धता व्यक्त गरेका छन । उनले नेपाली पत्रकारीताको बर्तमान अवस्था, नेपाल सरकारले जारी गरेको मिडिया काउन्सिल बिद्येयकले गरेको ब्यबस्था लगाएका बिषयमा जानकारी समेत गराएका छन ।
कार्यक्रममा नेपाल सरकारका न्युनतम पारिश्रमिक निर्धारण समितीका अध्यक्ष गंगाधर पराजुलीले श्रमजिवि पत्रकार ऐन २०५१ र न्युनतम पारिश्रमिकको कार्यान्वयनमा मिडिया संचालकका समस्याका बिषयमा जानकारी गराएका थिए ।
संचारमाध्यमहरु खोल्नेहरुले पनि बिभिन्न चुनौतिहरु सामना गर्नु परेको उनले बताए । सरकारको ऐन कानुनमा भएको जटिलताका कारणले मिडिया संचालन गर्न गाह्रो परेको पनि उनले बताएका छन ।
उनले कानुनी जटिलताका कारण मिडिया टिकाउन र पत्रकारहरुको पारिश्रमिक दिन समस्या भएको बताए । न्युनतम पारिश्रमिक समितीले पारिश्रमिक बृद्धि गर्ने र तोक्ने काम गरेको जानकारी गराउँदै पत्रकारहरुले न्युनतम पारिश्रमिक नपाउँदा जिविका चलाउन गाह्रो परिरहेको पराजुलीले बताए ।
नेपाल आदिवासी जनजाति महासंघका उपाध्यक्ष नविन रोका मगरले आदिवासी जनजाति पत्रकारहरुले संचारमाध्यममा समान पहुँच नहुनु, समाचार संप्रेषणमा विभेद गरेको पाईएको बताए ।
आदिवासी कुलमा जन्मिएर पत्रकारीतामा क्रियाशिल देशभरका जनजाति पत्रकारहरुको सहभागिता रहेको छ । कार्यक्रममा नेपाल आदिवासी जनजाति महासंघ, नेपाल आदिवासी जनजाति युवा महासंघ, महिला महासंघ, बिभिन्न प्रतिष्ठान लगाएतका सदस्यहरुको सहभागिता रहेको छ । भेला ७ गतेसम्म चल्ने छ र सिन्धुली घोषणापत्र जारी गर्ने छ । भेलाले भ्रमण वर्ष २०२० लाई समेत लक्षित गरेको आयोजकले जनाएको छ । सोमबार विहान ऐतिहासिक सिन्धुलीगढीमा कार्यक्रमको औपचारिक उद्घाटन हुने छ । प्रदेश नं. ३ का कानुनमन्त्री शालिकराम जम्वरकट्टेलले भेलाको उद्घाटन गर्नेछन ।
