सिन्धुली । जिल्लामा एक हजार ४२ जनाको मोतियाविन्दुको अप्रेशन भएको छ । सिन्धुलीमाढीमा सामुदायिक आँखा अस्पतालको सुरु भएदेखि हालसम्म उनीहरुको निःशुल्क अप्रेशन गरिएको आँखा अस्पताल सिन्धुलीका संयोजक एवम नेपाल रेडक्रस सोसाईटी सिन्धुलीका सभापति अशोक श्रेष्ठले बताए ।
विभिन्न आँखा परिक्षण शिविरबाट छनौट भएका तथा आँखा अस्पतालमा आएका विरामीको अप्रेशन गरिएको उनले जानकारी दिए । आइतबार आँखा अस्पतालमा सामाजिक परिक्षण गर्दै उनले यस्तो जानकारी दिएका हुन ।
सन २०१४ देखि जनकपुरको जानकी अस्पताल र तिलगंगा आँखा अस्पतालको प्राविधिक सहयोगमा आँखाको निःशुल्क अप्रेशन गरिदै आएको उनले बताए । सिन्धुलीको आँखा अस्पतालमा तिलगंगा आँखा अस्पतालमा हुने अप्रेशन सेवा निशुल्क गरिरहेका छौं, उनले भने ।
सन् २०१८ मा सबैभन्दा बढी २९७ जनाको मोतिया विन्दुको अप्रेशन गरिएको छ भने सन् २०१९ को ६ महिनामा १४० जनाको अप्रेशन गरिएको पनि श्रेष्ठले जानकारी दिए । सन् २०१९ मा अब २५० जनाको आँखा अप्रेशन गर्ने अस्पतालको लक्ष्य छ । सामुदायिक आँखा अस्पताल सिन्धुलीमा तिलगंगामा हुने सबैखालको अप्रेशन निःशुल्क गरिदै आएको भए पनि सिन्धुलीका विरामीले विश्वास कम गरेको उनले बताए ।
द फ्रेड हल्लोस फाउन्डेसनको आर्थिक सहयोगमा निशुल्क अप्रेशन गरिएको हो । पछिल्लो समय कमलामाई नगरपालिकाले नगरभित्रका आँखाका रोगीहरुको अप्रेशनमा ५ वर्षका लागि सहयोग गर्ने गरि सम्झौता गरेको छ । ५ वर्षका लागि प्रतिवर्ष ६ लाख निःशुल्क आँखा अप्रेशनका लागि सहयोग गरेको छ ।
