सिन्धुली । कमलामाई नगरपालिकाले नगरभित्रका खरका छाना हटाउने भएको छ । नगरपालिकाले २२० परिवारको खरको छाना हटाएर जस्तापाताले लाउने भएको हो । खरका छाना भएका घरको वडा कार्यालयबाट तथ्यांक संकलन गरिसकेर घरलाई जस्तापाताले छाउन लागेकोे नगरपालिकाले जनाएको छ ।
नगर क्षेत्रमा हुने आगलागीका घटनालाई न्युनिकरण गर्ने उद्देश्य अनुरुप विपन्न परिवारका घरहरु जस्तापाताले छाउन लागिएको कमलामाई नगरपालिकाका नायव सुब्बा बविन्द्रलाल माझीले बताए ।
खरको छानो हटाएर जस्तापाताले छाउनका लागी घरको आकार अनुसार २२.५ फिट लम्बाई र १३.५ फिट चौडाई भएकोे ८ सय ४५ बण्डल, १८ फिट लम्बाई र १३.५ फिट चौडाई भएको १ सय ७४ बण्डल, १९.५ फिट लम्बाई र १०.५ फिट चौडाई भएको ८८ बण्डल गरी जम्मा १ हजार १०७ बण्डल जस्तापाता आवश्यक पर्ने उनले बताए ।
जसका लागि १ करोड ५ लाख १६ हजार ५ सय बजेट लाग्ने नगरपालिकाले अनुमान गरेको छ । अवको केही दिन भित्र नै नगरभित्रका खरका छानो हटाउनका लागी १ हजार १ सय ७ बण्डल जस्तापाता वितरण गरिने नगरपालिकाले जनाएको छ ।
