सिन्धुली/सिन्धुलीको पर्यटकीय प्रवद्र्धनका लागि नेपाल पर्यटन बोर्डसँगको सहकार्यमा समृद्ध सिन्धुली अभियानले एकहप्ता फोटोमा सिन्धुलीलाई देखाउने उद्देश्यका साथ ‘फोटो सिन्धुली’ अर्थात सिन्धुलीका पर्यटकीय गन्तव्यको तस्वीर प्रदर्शनी गर्न थालेको छ । नेपाल पर्यटन बोर्ड, प्रदर्शनीमार्ग काठमान्डौमा बैशाख २० गतेदेखि एक हप्ता तस्वीर प्रदर्शनीमा राखिने छ ।
सिन्धुलीको पर्यटन, सिन्धुलीको साहित्य, कला, संस्कृति लगायत विषयमा दैनिक छलफल समेत गरिने समृद्ध सिन्धुली अभियानका दिपक श्रेष्ठले बताए । उक्त प्रर्दशनीमा पर्यटनलाई प्रवद्र्धन हुने भिडियोहरु समेत प्रदर्शन गरिने छ ।
उक्त प्रदर्शनीमा एक सय पर्यटकीय गन्तव्यमा समेटिउका सिन्धुलीका तीन क्षेत्रका तस्वीरलाई प्राथमिकता दिईने छ । भिजिट नेपाल २०२० मा सिन्धुलीगढी, सुनकोशी र महाभारत क्षेत्रलाई पर्यटकीय गन्तव्यमा राखिएको हुदा यी क्षेत्रका फोटो प्रर्दशनीमा राखिएको श्रेष्ठले बताए ।
ऐतिहासिक स्थल सिन्धुलीगढी, जलयात्राका लागि सुनकोशी नदि र पदयात्राका लागि महाभारत क्षेत्रलाई नेपाल पर्यटन वोर्डले २०२० को पर्यटकीय गन्तव्यका रुपमा लिएको छ । सिन्धुलीको प्रतिनिधित्वका हिसावले यी तीन क्षेत्रको पर्यटन विकास र प्रवद्र्धन गर्नसके सिन्धुलीले निकै लाभ लिन सक्ने पनि उनले बताए ।
