सिन्धुली । कमलामाई नगरपालिका सिन्धुलीको आयोजनामा सदरमुकाम भएर बग्ने गौमति (ग्वाङ) खोलाको शनिबार सरसफाई गरिएको छ । नगरप्रमुख खड्ग खत्री, उपप्रमुख मञ्जु देवकोटा, प्रमुख जिल्ला अधिकारी ज्ञान प्रसाद ढकाल लगाएतको नेतृत्वमा खोलाको सरसफाई गरिएको हो ।
सरसफाई कार्यक्रममा नेपाली सेना, नेपाल प्रहरी, स्थानीय बासिन्दा, कर्मचारी, सामाजिक अभियन्ताहरु, पत्रकारहरु, टोलविकास संस्थाहरु लगाएतको सहभागिता रहेको थियो । जिल्ला अदालत अगाडिदेखि खुलामञ्च, धुराबजार आसपास, मधुटार तथा माढीबजार हुदै कारागार नजिकको पुलसम्म सरसफाई गरिएको थियो ।
सरसफाईका क्रममा खोलाको छेउँमा अतिक्रमण भएका जग्गाहरुको समेत अवलोकन गरिएको थियो । सरसफाई कार्यक्रममा नेतृत्व गर्दै कमलामाई नगरपालिकाका प्रमुख खड्ग खत्रीले खोलामा फोहोर फाल्नेलाई कारवाहिको दायरामा ल्याउने बताए ।
उनले खोलालाई सफा गरि यसको वहाव क्षेत्रको संरक्षण गर्न नगरपालिका लाग्ने समेत बताए । यस्तै नदी किनारका खाली जग्गामा वृक्षारोपण गर्ने र वस्न योग्य क्षेत्रका रुपमा विकास गर्ने प्रतिवद्धता समेत व्यक्त गरेका छन ।
२०७५ लाई नगरपालिकाले सरसफाई वर्षका रुपमा मनाएको भए पनि निरन्तरता टुटेका कारण केहि समस्या भएको बताउँदै सरसफाईलाई दिर्घकालिन बनाउन नगरपालिकाले लागि परेको र निरन्तरता दिदैं जाने बताएका छन ।
