सिन्धुली । अन्तर्राष्ट्रिय महिला दिवसको पूर्व सन्ध्यामा कमलामाई नगरपालिका सिन्धुलीले महिला जनप्रतिनिधि, मेलमिलाप कर्ता लगाएतलाई न्यायिक सम्पादन तथा मेलमिलाप सम्बन्धि एक दिने तालिम विहिबार भिमानमा दिएको छ । कमलामाई नगरपालिकाको आयोजना तथा सहकार्य नेपाल सिन्धुलीको संयोजनमा उक्त तालिमको आयोजना गरिएको हो ।
तालिममा कमलामाई नगरपालिकाका कानुनी सल्लाहकार टंकविक्रम थापा, नगरपालिकाका सामाजिक शाखा प्रमुख सागरकुमार ढकाल र सामुदायिक मेलमिलाप कार्यक्रमका जिल्ला संयोजक पार्वति भट्टराईले सहजीकरण गरेकी थिइन । मेलमिलापका सिद्धान्त, न्यायिक समितिका काम कर्तव्य र न्यायीक निरुपणका प्रक्रिया, हालसम्म भएका कामका बारेमा छलफल तथा सहजीकरण गरिएको थियो ।
कमलामाई नगरपालिकाका उपमेयर मञ्जु देवकोटाको अध्यक्षता तथा मेयर खड्ग खत्रीको प्रमुख आतिथ्यतामा भएको कार्यक्रममा नगरपालिकाका वडा नं. ८, ९, १०, ११, १२ १३ र १४ नम्बर वडाका वडाध्यक्ष, महिला जनप्रतिनिधि, सामुदायिक मेलमिलाप कार्यकर्ताको सहभागिता रहेको थियो ।
यसैबीच सोहि कार्यक्रममा लैंगिक विभेद न्युनिकरण तथा स्थानीय योजना प्रक्रियामा महिला सहभागिताका विषयमा समेत छलफल भएको छ । स्थानीय तहको योजना तर्जुमा प्रकृयामा महिलाहरुको भूमिका तथा सहभागिताको विषयमा सहकार्य नेपालकी सिरमला तामाङले कार्यपत्र प्रस्तुत गरेकी थिइन ।
कार्यक्रममा लैंगितक विभेदको वर्तमान अवस्था, चुनौती र निराकरणका उपाय, स्थानीय तहमा महिलाको अर्थपूर्ण सहभागिता तथा निर्णायक भूमिका लगाएतका विषयमा जनप्रतिनिधि महिलाहरुसँग दोहोरो छलफल समेत भएको थियो ।
