सिन्धुली/पर्यटन, कृषि उत्पादन र जडिबुटीको प्रवद्र्धन गर्ने उद्देश्य सहित फिक्कल गाउँपालिका सिन्धुलीद्वारा फिक्कलको खाङसाङबेसीमा पहिलो फिक्कल महोत्सव बुधबारबाट सुरु भएको छ । फिक्कल गाउँपालिकाको आयोजनामा सुरु भएको महोत्सवको उद्घाटन नेपाल सरकारका सूचना, प्रविधि तथा सञ्चार मन्त्री गोकुल बाँस्कोटाले उद्घाटन गरेका छन ।
महोत्सवमा स्थानीय कृषि उत्पादन, घरेलु उत्पादन तथा अन्य व्यवसायीक स्टल गरि १ सय २० स्टल राखिएका छन् । महोत्सव उद्घाटनमा जातिय तथा साँस्कृतिक झलक दिने भेषभुषा, बाजागाजा सहितको झाँकी प्रदर्शन गरिएको थियो । प्रगतिशील प्रतिभा केन्द्रका कलाकारहरुले महोत्सवमा नृत्य प्रस्तुत गरेका छन् ।
फिक्कल गाउँपालिका अध्यक्ष धनबहादुर कार्कीको अध्यक्षतामा सम्पन्न उद्घाटन कार्यक्रममा सहयोगीहरुलाई मायाको चिनो प्रदान गरिएको थियो । महोत्सव आयोजक समितिकी संयोजक तथा गाउँपालिका उपाध्यक्ष पार्वती सुनुवारका अनुसार महोत्सवमा एक लाख दर्शकले अवलोकन गर्ने अपेक्षा गरिएको छ । महोत्सव माघ ७ गतेसम्म चल्ने छ ।
महोत्सवको आकर्षण कला र कलाघर
फिक्कल महोत्सवमा पनि सिन्धुलीका कला र कलाघर सबैको आकर्षण बनेका छन । महोत्सवमा सोहि सन्दर्भमा पुस २८ गतेदेखि आयोजित फिक्कल कला शिविर २०७५ मा तयार पारिएका चित्रकलाको प्रदर्शनमा राखिएको छ । कला शिविरमा अंशुराम खाइजु, मंगल प्रजापति, सुरेम देशार, अनिल महर्जन, जयराम महर्जन र अनिल खड्काका चित्रकला राखिएका छन् । फिक्कल गाउँपालिकाको भूदृश्यका साथै फिक्कल टावरबाट देखिने सगरमाथा लगायत ताप्लेजुङदेखि लम्जुङसम्मका हिमाललाई चित्रकलामा उतारिएको छ ।
महोत्सवमा सिन्धुली कला घर दर्शकको आकर्षण बनिरहेको छ । कला घरमा लोपोन्मुख सामग्रीका साथै भेषभुषा, चित्रकला राखिएका छन् । फिक्कल भ्युटावरको नमुना स्वरुप छ जनासम्म चढ्न मिल्ने नमुना फिक्कल भ्युटावर निर्माण गरिएको प्रतिभा केन्द्रका अध्यक्ष सुमन आईडुले बताए । कला घर भित्र नेपाली मौलिकताको सम्मान, जिल्ला तथा फिक्कलको पहिचानका निम्ति कोशिस गरिएको उनले बताए ।
यस्तै महोत्सवमा प्याराग्लाइडिङ, सुनकोशीमा जलयात्रा र खाङसाङदेखि फिक्कल टाकुरासम्म पदयात्राको समेत व्यवस्था गरिएको छ । ओखलढुंङ्गाको टोड्केबाट प्याराग्लाइडिङको सफल परीक्षण तीनदिन अघि नै भइसकेको छ ।
