सिन्धुली/सिन्धुली सदरमुकाम सिन्धुलीमाढीमा बुधबार बालविवाह विरुद्ध खुला बहस कार्यक्रम गरिएको छ । जिल्ला युवा सञ्जाल सिन्धुलीको आयोजनामा खुला बहसको आयोजना गरिएको हो । खुला बहस कार्यक्रममा जिल्लाका विभिन्न सरकारी निकायका प्रमुखहरु, अधिकारकर्मीहरु, कानुन व्यवसायीहरु पत्रकार महासंघ, कानुन कार्यान्वयनका निकायहरु, स्थानीय प्रशासन, स्थानीय निकायका प्रमुख तथा प्रतिनिधिहरु र नीजि विद्यालयका शिक्षक, विद्यार्थीहरुको सहभागिता रहेको थियो ।
बाल विवाह र आजको अवस्थाका बारेमा युवा सञ्जालका अध्यक्ष रामकाजी घलानले प्रस्तुतिकरण गरेपछि दोहोरो छलफल गरिएको थियो । लैंगिक हिंसा विरुद्धको १६ दिने अभियान सञ्चालनको चौथो दिन उक्त कार्यक्रमको आयोजना गरिएको हो । लैंगिक हिंसा र दुव्र्यवहारःछैन हामीलाई स्वीकार भन्ने नाराका साथ मनाइरहेको यो अभियानका क्रममा जिल्लाका विद्यार्थीहरुलाई कानुनी तथा सामाजिक वहसमा सहभागि बनाईएको हो ।
कार्यक्रममा विद्यार्थीहरुले लैंगिक हिंसा, यसका अभियान तथा कार्यक्रम, न्यायिक निकायमा पहुँच र उजुरी, कानुनी दण्ड सजाय लगाएतका विषयमा प्रश्न राखेका थिए भने बालविवाह अन्त्यका लागि बनेका नीति तथा कार्यक्रम, बजेट लगाएतका विषयमा समेत प्रश्न उठेका थिए । सरोकारवालाको तर्फबाट ३ नं. प्रदेश सांसद विनोद खड्का, जिल्ला समन्वय समितिका प्रमुख शंकरराज बर्मा तिवारी, कमलामाई नगरपालिकाका मेयर खड्ग खत्री, सहायक प्रमुख जिल्ला अधिकारी विजया प्रसाईं, प्रहरी इन्स्पेक्टर श्याम कृष्ण के.सी, जिल्ला सरकारी वकिल कार्यालयका अनन्तराज न्यौपाने, नेपाल पत्रकार महासंघ सिन्धुलीका उपाध्यक्ष बिमला पाण्डे, अधिवक्ता शुशिला थिङ लगाएतले उठेका सवालको जवाफ दिएका थिए । कार्यक्रम प्लान नेपालको सहयोग, ओरेक नेपाल र कमलामाई नगरपालिका सिन्धुलीको समन्वयमा भएको थियो ।
