सिन्धुली । सिन्धुली आइडल सिन्धुलीकी गायन विधातर्फकी तृतीय हुन सफल दिपा तामाङ तथा नृत्य विधामा प्रथम हुन सफल बाबुलाल भोलनलाई स्वतन्त्र विद्यार्थी युनियन सिद्धज्योति शिक्षा क्याम्पसले सम्मान गरेको छ ।
भर्खरै सम्पन्न सिन्धुली आइडलमा गायन तर्फबाट तृतीय स्थान हासिल गर्न सफल भएकोमा तामाङलाई तथा नृत्य प्रतियोगितामा प्रथम भएवापत भोलनलाई खादा, अविर र पुष्पगुच्छासहित सम्मान गरेको हो । उनीहरुलाई आगामी दिन अझ धेरै सफलताको कामना सहित उत्साहित बनाउने उद्देश्यका साथ सम्मान गरिएको आयोजकले जनाएको छ ।
स्वतन्त्र विद्यार्थी युनियन सिद्धज्योति शिक्षा क्याम्पसका अध्यक्ष दिपेन्द्र फुयालको अध्यक्षता तथा जिल्ला खेलकुद विकास समितिका अध्यक्ष एवं नेकपा सिन्धुलीका नेता सुर्य पाख्रिनको प्रमुख आतिथ्यता तथा क्याम्प्स सञ्चालक समितिका अध्यक्ष तथा नेपाली काँग्रेस सिन्धुलीका नेता माणिक कुमार ढकालको विशिष्ट आतिथ्यतामा भएको उक्त कार्यक्रममा क्याम्पस प्रमुख अर्जुन कुमार दाहाल, विद्यार्थी नेता दिपेश बराल लगायतले मन्तव्य राखेका थिए ।
कार्यक्रममा क्याम्पसमा कक्षा ११ देखी स्नातक चौथो वर्षसम्म अध्ययनरत विद्यार्थी अध्यापनरत सम्पूर्ण प्राध्यापक लगायतको उपस्थिति रहेको थियो । कार्यक्रमको सञ्चालन भने स्ववियू सचिव कन्चन पहाडीले गरेका थिए ।
स्मरण रहोस् सिन्धुली आइडलमा तृतीय स्थान ल्याउन सफल तामाङ सिद्धज्योति शिक्षा क्याम्पसमा स्नातक तह तेस्रो वर्षमा अध्ययनरत छिन् ।
