सिन्धुली । फिक्कल गाउँपालिका वडा नं. २ को ओमकारेश्वरी प्राथमिक विद्यालय पोखरीका प्रधानाध्यापक पुरुषोत्तम बरालले विद्यालयमा अध्ययनरत ४ जना बालकलाई अपमानजनक तथा अमानवीय व्यवहार गरेको खुलासा भएको छ ।
विहिबार सोहि गाउँपालिका वडा नं. २ घर भई उक्त विद्यालयमा कक्षा २ र ३ मा अध्ययनरत बालकहरुलाई कक्षा कोठामा नै कैंचि प्रयोग गरि कपाल काटेर अपमान गरेको भन्दै अविभावकले विहिबार नै विद्यालय घेराउ गरेपछि यस्तो खुालसा भएको हो । अपमानित हुनेहरुमा कक्षा २ मा पढ्ने राम बहादुर सार्की, काजी सार्की, कक्षा ३ मा पढ्ने खेम बहादुर खत्री र सरोज राउत रहेका छन ।
कपाल काटेर सरसफाई गरेर आउ भनेको नमानेका कारण विद्यार्थीहरुलाई त्यसो गरिएको प्रधानाध्यापक बरालले बताए । बराल भन्छन, ‘२–३ पटक कपाल काटेर आउ भनें नमानेपछि ठाउँ ठाउँमा काटेर पठाएको हुँ । ठाउँ ठाउँमा काटिदिएपछि अविभावकले कपाल काटेर पठाउलान भनेर त्यसो गरेँ, तर यसले त ठूलो रुप लियो ।’
बालबालिकालाई नपढेको र सरसफाई नगरेको भन्दै गाली बेइज्जती र कुटपिट गरेर बालबालिका यातना दिएको पीडित बालकका अविभावकको दावी रहेको छ ।
यता प्रधानाध्यापक बरालले बालबालिकालाई शारीरिक र मानसिक यातना नदिएको बताउँदै आएका छन । उनी भन्छन, ‘मैले सकारात्मक सुधारका लागि गरेको हुुँ यसैमा मेरो गल्ती भयो । अविभावक र बालबालिकाका अगाडि गल्ती स्वीकार गर्ने मौका पाउनुपर्याे ।’
उक्त वडाका अध्यक्ष शंकर भण्डारीले आइतबार विद्यालयमा बैठक बसिने र घटनाका बारेमा छलफल गरिने बताए । यता गाउँपालिकाका उपाध्यक्ष पार्वती सुनुवारले घटनाका बारेमा आफुले कुनै जानकारी नपाएको बताईन । उनले शिक्षकले नियतबस नगरेको र सुधारका लागि त्यसो गरेको पनि हुन सक्ने बताइन ।
के छ कानुनमा
जिल्ला सरकारी वकिल कार्यालय सिन्धुलीका सूचना अधिकारी अनन्त न्यौपानेका अनुसार भदौ १ गतेदेखि लागु भएको अपराध संहिता ऐन २०७४ को धारा १६८ को उपधारा १ मा कसैले कसैलाई अपमानजनक वा अमानवीय व्यवहार गर्न वा गराउन पाईदैन भनि उल्लेख गरिएको छ ।
सोहि धाराको स्पष्टीकरणमा ग र घ मा सामाजिक वहिस्कार गर्ने वा अन्य जुनसुकै काम गरि क्रुर, अमानवीय वा अपमानजन्य व्यवहार गर्नेलाई यस्तो व्यवहार गरेको मानिने उल्लेख गरिएको छ ।
सोहि धाराको उपधारा २ मा सोहि कसुर गरे वापतको सजायको व्यवस्था गरिएको छ । यस्तो कसुर गर्नेलाई पाँच वर्षसम्म कैद र पचास हजार रुपैंयासम्म जरिवानाको व्यवस्था गरिएको छ ।
