सिन्धुली । जिल्लाका १५ हजार ८ सय चालिस जना बालबालिकालाई पोलियो विरुद्धको खोप आईपिभी लगाईने भएको छ । जिल्लामा जेठ २० देखि २५ गतेसम्म खोप अभियान सञ्चालन गरिने जनस्वास्थ्य कार्यालय सिन्धुलीले जनाएको छ ।
राष्ट्रिय खोप कार्यक्रम अनुसार उक्त अभियान सञ्चालनका लागि जिल्ला स्तरीय खोप समन्वय समिति तथा सञ्चारकर्मीहरुसँगको अभिमुखीकरण कार्यक्रममा उक्त जानकारी दिईएको हो ।
जिल्ला समन्यय समितिका समन्वय प्रमुख कार्साङ लामाको अध्यक्षतामा भएको कार्यक्रममा आइपिभी खोप २०७३ साल वैशाख देखि २०७५ असोजसम्म जन्मिएका बालबालिकालाई निर्धारण गरिएको जनस्वास्थ्य कार्यालयका खोप अधिकृत पुष्पराज पन्तले बताए ।
जिल्लाभर एकै पटक सञ्चालन गरिने खोप अभियानमा आइपिभी खोप केन्द्र संख्या ६ सय ५८ तोकिएको उनले बताए । जसमा विद्यालय खोप केन्द्र ५ सय ७३ र स्वास्थ्य संस्थामा ८५ स्थानमा खोप केन्द्र तोकिएको छ ।
खोप अभियानमा ६ सय ५८ स्वास्थ्यकर्मी र ६ सय ५८ जना स्वयमसेवक परिचालन हुने छन । प्रतिदिन प्रति स्वास्थ्यकर्मी १२५ जना बालबालिकालाई खोप लगाईने लक्ष रहेको छ ।
