सिन्धुली । नेपाल प्रेस युनियन सिन्धुलीले संस्थाको ३३ औं स्थापना दिवस मनाएको छ । स्थापना दिवसका अवसरमा नेपाल प्रेस युनियन सिन्धुलीले जिल्लामा प्रेस तथा अभिव्यक्ति स्वतन्त्रताको विषयमा विचार गोष्ठीको आयोजना गरि दिवस मनाएको हो । कार्यक्रममा बोल्ने अधिकांश वक्ताले लोकतन्त्र जस्तो उत्कृष्ट व्यवस्थामा पनि प्रेस तथा अभिव्यक्ति स्वतन्त्रता हनन हुँदै गएको बताएका छन ।
युनियनका जिल्ला अध्यक्ष वरुण लामिछानेको अध्यक्षता एवम् नेपाली कांग्रेसका सभापति उपेन्द्र पोखरेलको प्रमुख आतिथ्यतामा सम्पन्न कार्यक्रममा बोल्ने अधिकांश वक्ताले लोकतन्त्रमा पनि पत्रकारीता क्षेत्र संकटमा पर्नु दुःखद पक्ष रहेको बताए ।
कार्यक्रममा बोल्दै नेपाली कांग्रेस सिन्धुलीका सभापति पोखरेलले लोकतन्त्रका नाममा छाडातन्त्र बढ्दै जाँदा पत्रकारीता नै संकटमा पर्ने हो की भन्ने चिन्ता बढ्न थालेको बताए । उनले नेपाली समाज नै नकारात्मक बन्दै गएको बताउँदै लोकतन्त्र विरोधीहरुको पहिलो प्रहार सञ्चार क्षेत्रमाथि सुरु भएको बताए ।
कार्यक्रममा बोल्दै न्युनतम पारिश्रमिक निर्धारण समितिका पूर्व सदस्य बिमला पाण्डेले लोकतन्त्रको सुन्दर पक्षलाई पत्रकारीता रहेको बताईन । उनले देशका ठूला ठूला राजनीतिक तथा सामाजिक परिवर्तन पत्रकारीताका माध्यमबाट सम्भव भएको बताउँदै पत्रकारलाई विचार विहिन नसम्झन आग्रह गरिन । उनले पत्रकारीता क्षेत्रका सबै संघसंस्था विगतमा जस्तै पेशागत सवालमा एक ढिक्का हुन आवश्यक रहेको बताईन ।
नेपाल पत्रकार महासंघ सिन्धुलीका अध्यक्ष कृष्णहरी घिमिरेले लोकतन्त्रमा प्रेस तथा अभिव्यक्ति स्वतन्त्रता सुरक्षित हुनुपर्नेमा जोड दिए ।
कार्यक्रममा बोल्दै नेपाल पत्रकार महासंघका पूर्व अध्यक्ष राजकुमार कार्कीले युटुवरले वर्षाैंदेखिको पत्रकारीताको लगानीमा प्रश्न उठाईरहेको र नागरिक समाज उतैतिर ढल्किरहेको बताए ।
कार्यक्रममा बोल्दै प्रेस चौतारी नेपालका अध्यक्ष विनय दाहालले लोकतन्त्रको विशिष्ट अभ्यास सञ्चार क्षेत्रले प्रयोग गर्न नपाएको बताए । यस्तै प्रेस सेन्टर सिन्धुलीका अध्यक्ष नविन श्रेष्ठले लोकतन्त्रलाई सुदृढ गर्न प्रेस स्वतन्त्रता आवश्यक रहेको बताए । कार्यक्रममा बोल्दै फोनिजका जिल्ला अध्यक्ष रोहित गुरुङले सामाजिक सञ्जालको प्रहार र आलोचना पत्रकारमाथि अत्यधिक देखिएको बताए । कार्यक्रममा डब्लुडब्लुजेका अध्यक्ष राधिका बुढाथोकीले प्रेस विराधी अभिव्यक्तिहरु बढ्न थालेको बताईन ।
