सिन्धुली । क्रियाशिल पत्रकार महिला सिन्धुली शाखाले कार्यालय स्थापना गरेको छ । विहिबार कनपा ५ नयाँबस्तीमा स्थापना गरिएको कार्यालयको उद्घाटन गरिएको हो ।
कार्यालयको उद्घाटन जिल्ला समन्वय समितिका उपप्रमुख शान्ता कार्कीले गरेकी छिन । कार्यालयको उद्घाटन समारोहमा बोल्दै कार्कीले महिला पत्रकारहरुको कार्यालय व्यवस्थापनमा सधै सहयोग रहने प्रतिवद्धता व्यक्त गरेकी छिन । उनले पत्रकार महिलाहरुसँग जनप्रतिनिधि महिलाहरुले सधै सहकार्य गर्न चाहेको बताईन ।
कार्यालय उद्घाटन कार्यक्रममा बोल्दै कमलामाई नगरपालिकाका उपप्रमुख मञ्जु देवकोटाले स्थानीय तहमा प्रस्तावना सहित आएमा सहयोग गर्न सकिने बताएकी छिन । उनले पत्रकारहरुले नगरपालिकाले न्यायीक क्षेत्र, विकास र समृद्धिमा गरेका उल्लेख्य कामको उजागर गरिदिन र गलत काम भएमा खबरदारी गर्न समेत सुझाएकी छिन ।
कार्यक्रममा बोल्दै संस्थाका संस्थापक अध्यक्ष एवम् न्युनतम पारिश्रमिक निर्धारण समितिका पूर्व सदस्य बिमला पाण्डेले संस्थालाई व्यवस्थित गर्न आर्थिकसँगै समन्वयको खाँचो हुने बताईन ।
डब्लुडब्लुजे सिन्धुलीका अध्यक्ष राधिका बुढाथोकीको अध्यक्षता एवम जिल्ला समन्वय समितिका उपप्रमुख शान्ता कार्कीको प्रमुख आतिथ्यतामा सम्पन्न कार्यक्रममा नेपाल पत्रकार महासंघ सिन्धुलीका कोषाध्यक्ष अनिल भण्डारी, प्रेस युनियन सिन्धुलीका सभापति बरुण लामिछाने, प्रेस चौतारी नेपाल सिन्धुलीका अध्यक्ष विनय दाहालले मन्तव्य व्यक्त गरेका थिए । कार्यक्रममा डब्लुडब्लुजे सिन्धुलीका सदस्य विमला मगरले स्वागत गरेकी थिईन भने कार्यक्रमको सहजीकरण सचिव सुनिता वि.कले गरेकी थिईन ।
यसैबीच डब्लुडब्लुजे सिन्धुलीले तीज मिलन कार्यक्रम समेत गरेको छ । महिला पत्रकारहरुसँग शुभकामना आदान प्रदान सहित तीज मिलन कार्यक्रम गरेको हो । तीज मिलन कार्यक्रममा बोल्ने वक्ताहरुले संस्थामा योगदान दिएका र पत्रकारीतामा जोडिएका पत्रकार महिलालाई समेटेर अगाडि बढ्न सुझाव दिए ।
