सिन्धुली । सिन्धुलीका पुराना पत्रकार कृष्णप्रसाद गौतमलाई ‘विशाल कुमार स्मृति पत्रकारिता पुरस्कार प्रदान गरिएको छ । बुधबार २० औं विशाल कुमार स्मृति दिवसको अवसरमा नेपाल पत्रकार महासंघ सिन्धुलीका संस्थापक कोषाध्यक्ष गौतमलाई पाँच हजार नगद सहित दोसल्ला ओढाएर सम्मान गरिएको हो ।
पत्रकारिता मार्फत समाजलाई उल्लेखनीय योगदान दिएको भन्दै उनलाई नेकपा एमालेले सम्मान गरेको हो । विशाल कुमार स्मृति प्रतिस्ठानले हरेक वर्ष प्रदान गर्दै आएको उक्त पुरस्कार यस वर्ष गौतमलाई प्रदान गरिएको हो ।
नेकपा एमालेका जिल्ला अध्यक्ष रामकुमार कार्कीको अध्यक्षता एवम् नेकपा एमालेका केन्द्रीय सदस्य मनोजजंग थापाको प्रमुख आतिथ्यतामा भएको कार्यक्रममा गौतमलाई सम्मान गरिएको हो । पत्रकार गौतम समाज परिवर्तनको आन्दोलनमा पत्रकारीता मार्फत २०४६ सालदेखि क्रियाशिल रहदै आएका छन ।
तत्कालीन माओबादीका केन्द्रीय सदस्य शेर मान कुँवर ‘विशाल’ र वैकल्पिक केन्द्रीय सदस्य मोहनचन्द्र गौतम ‘कुमार’ को नेपाली सेनाद्वारा सिराहा जिल्लाको धन्छवार २०६० साल भाद्र २० गते हत्या गरेको थियो । प्रतिष्ठानले विशाल कुमारको स्मृतिमा पत्रकारीता पुरस्कार स्थापना गरेको थियो । गत वर्षदेखि यो पुरस्कार प्रदान गरिदैं आएको छ । गत वर्ष नेपाल पत्रकार महासंघका संस्थापक अध्यक्ष शेषराज दाहाललाई सम्मान गरिएको थियो ।
