सिन्धुली । नेकपा एमालेको जनसंगठन राष्ट्रिय युवा संघ सिन्धुलीको ९ औं जिल्ला अधिवेशन पदाधिकारी चयनको मतदान प्रक्रियामा विवाद भएपछि स्थगित भएको छ । युवा संघको पदाधिकारी चयनमा विवाद भएसँगै निर्वाचन प्रक्रिया स्थगित भएको युवा संघ सिन्धुलीले जनाएको छ । युवा संघ सिन्धुलीको ५७ सदस्यीय कमिटी निर्माण क्रममा पदाधिकारी चयनमा समस्या आएको हो ।
सर्वसम्मतबाट पदाधिकारी चयन हुन नसकेपछि निर्वाचन प्रक्रियामा लान खोजिएको थियो । निर्वाचन प्रक्रियामा मतदानको तयारी हुदा युवाहरुले विरोध गरेर मतदान हुन दिएका थिएनन । मतदानका लागि निर्वाचन क्षेत्रमा ल्याईएको मतपेटिका र मतदाता नामावलीमा केहि प्रतिनिधिहरुले क्षती गरेपछि मतदान स्थगित गरिएको छ ।
युवा संघको ५१ जना सदस्य निर्विरोध निर्वाचित भएका छन । कमलामाई नगरपालिका र दुधौली नगरपालिकाबाट ३/३ जना महिला सहित ८/८ जना सदस्य निर्वाचित भएका हुन । यस्तै जिल्लाका सात गाउँपालिकाबाट २/२ जना महिला सहित ५/५ जना सदस्यहरु निर्वाचित भएका छन ।
पदाधिकारीमा सहमति जुट्न नसकेपछि मतदानको तयारी गरिएको थियो । मतदान हुन नसकेपछि उमेदवारी दिएका सबै पदाधिकारीका उमेदवारको नामावली केन्द्रीय कमिटीमा पठाईने भएको छ । छ जना पदाधिकारी केन्द्रले टुंग्याउने गरि पठाउन लागिएको युवा संघ सिन्धुलीका निवर्तमान कोषाध्यक्ष छवी पाख्रिनले बताए ।
उनका अनुसार अध्यक्षमा दिपक माझी, अरुण पाख्रिन र मिजास कार्कीको उमेदवारी परेको थियो । उपाध्यक्षमा पोष्टराज काफ्ले, किरण बुढाथोकी र प्रकाश रायमाझीको उमेदवारी परेको थियो ।
यस्तै सचिवमा श्रवण नेवा खड्गी, छवि पाख्रिन र शिव बरालको उमेदवारी परेको थियो । सहसचिवमा मिलन दर्लामी अरुण कुमार शाह र कोषाध्यक्षमा प्रमोद भुजेल, लक्सना बरालको उमेदवारी परेको थियो । युवा संघको अधिवेशन आइतबार देखि सिन्धुलीमाढीमा सुरु भएको थियो ।
