सिन्धुली । जिल्लामा केहि दिनदेखि आँखा पाक्ने रोगको प्रकोप फैलिएको छ । आँखा पाक्ने रोग फैलिएसँगै जिल्लामा रहेको सामुदायि आँखा उपचार केन्द्रमा आँखा उपचारका लागि आउनेहरुको भिड लागेको छ । करीव एकसातादेखि दैनिक जस्तो आँखा अस्पतालमा विरामीको भिड लाग्ने गरेको छ ।
दैनिक २ सय भन्दा बढी विरामी आँखा उपचारका लागि आउने गरेको सामुदायिक आँखा उपचार केन्द्रका नेत्र अधिकृत धन बहादुर मगरले बताए । उनका अनुसार अस्पतालमा आउने विरामीहरु प्रायः आँखा पाक्ने रोगका विरामी रहेका छन । यस्ता विरामी ८ सय भन्दा बढीको उपचार गरिसकिएको उनले बताए ।
आँखा पाक्ने रोग विशेष गरि कमलामाई नगरपालिकामा अत्यधिक देखिएको छ । कमलामाई नगरपालिकासँगै अन्य पालिकाका केहि विरामीहरु पनि अस्पतालमा आउन थालेको मगरले बताएका छन । आँखा पाक्ने रोग वर्षातको समयमा देखिने अन्य सरुवा रोग जस्तै भएको र यसको उपचार सम्भव भएको उनले बताएका छन । कसैलाई २, ४ दिनमै निको हुने कसैलाई एकहप्ता जस्तो निको हुन समय लाग्ने उनले बताए । यो रोगले अन्धोपना भने नल्याउने उनले बताएका छ ।
यो रोगको संक्रमण करिब साउन भरी रहन सक्ने उनले बताए । आँखा उपचार केन्द्रले औषधि, जनशक्तिको व्यवस्थापन गरि उपचारको तयारी अवस्थामा रहेको पनि उनले बताएका छन ।
कमलामाईका सबै विद्यालय बन्द
आँखा पाक्ने रोगको संक्रमण विशेष गरि बालबालिकाहरु प्रभावित भएको पनि अस्पतालले जनाएको छ । सबै उमेर समूहमा आँखा पाक्ने रोगको संक्रमण देखिएपनि विद्यालयमा समूहमा रहने बालबालिका यसबाट बढी प्रभावित छन । कमलामाई नगरपालिकाका सामुदायिक तथा नीजि विद्यालयहरुमा बालबालिकामा आँखा पाक्ने रोग देखिएको र विद्यार्थी संख्या दिनहुँ घट्न थालेपछि शनिबारसम्मका लागि विद्यालय बन्द गरिएको छ ।
कमलामाई नगरपालिकाले सार्वजनिक सूचना जारी गर्दै सबै विद्यालयहरु बन्द गर्न निर्देशन गरेको हो ।
आइतबार बसेको नगर शिक्षा समितिको बैठकले साउन २२ गतेदेखि साउन २६ गतेसम्म विद्यालय बन्द गर्ने निर्णय गरेको हो । नगरपालिका भित्रका सबै विद्यालय बन्द भएको कमलामाई नगरपालिकाका उपप्रमुख मञ्जु देवकोटाले बताईन ।
