सिन्धुली । सर्लाहिबाट बालश्रममा लगाउन लगिएका एघार बालबालिकाको सिन्धुलीको भिमानबाट उद्धार गरिएको छ । सर्लाहिबाट भक्तपुरमा गार्मेन्ट उद्योगमा काम लगाउन लगिदै गरेका ११ बालबालिकाको मंगलबार उद्धार गरिएको हो ।
उनीहरुलाई इलाका प्र्रहरी कार्यालय भिमानले उद्धार गरि परिवारको जिम्मा लगाएको छ । बालबालिकालाई बालश्रमका लागि भक्तपुर लादैं गरेका दुईजनालाई भिमान प्रहरीले पक्राउ गरेको छ । उनीहरुलाई सोधपुछका लागि इलाका प्रहरी कार्यालय भिमानमा राखिएको जिल्ला प्रहरी कार्यालय सिन्धुलीले जनाएको छ ।
सर्लाहिबाट काठमान्डौ जाने वा४ख७१७५ नं.को यात्रुबाहक वसमा उनीहरुलाई काठमान्डौ लगिदै गरेको भन्ने जानकारीका आधारमा बस खानतलासी गरि बालबालिकाको उद्धार गरिएको हो ।
चार बालिका सहित ११ जनालाई बालश्रमका लागि लाँदै गरेका महोत्तरीको औरहि १ बस्ने जोगिन्दर चौधरी र सर्लाहि हरिहरपुरगढी गाउँपालिका घर भई सूर्यविनायक ६ भक्तपुर बस्ने लालबहादुर डिम्दोङलाई प्रहरीले पक्राउ गरेको हो ।
१५ देखि १७ वर्ष उमेर समूहका ती बालबालिकालाई काम लगाईदिने प्रलोभनमा लगिएको प्रहरीले जनाएको छ । बालबालिकालाई प्रहरीले अविभावकको जिम्मा लगाएको छ । उनीहरु महोत्तरी, सर्लाहि, रौतहट र बारा जिल्लाका बालबालिका रहेको जिल्ला प्रहरी कार्यालय सिन्धुलीका डिएसपी हरिकृष्ण केसीले जनाएका छन ।
